Hadien wa pynmih hukum u Joint Director ka School Education & Literacy wow khut Admission ya ki khynnah ki wym pu yoh thaw puræ ha ka Class XI, ynne ka sngi kiwa kitkaam ka JYF wa ka JSM da mih ki chaphrang wow ong wa i yakhih yong ki ar seiñ da man i iwa jop heiwa ki khynnah da ye ki wow lai chim noh ya ki Form na ka Principal ka Government Boys Higher Secondary School, Jowai.
U President ka JYF, u OL Tariang da ekhublei u ya ka JSM wa ka JAC ka Ri-loom Jaiñtia wa da embynta ko ha ini i yakhih, kamjooh leh ya ka chnat puræ puthi ka sorkar kawa leh yeiwa emkaam khamtam ya ki bei ki pa ki khynnah kiwa da man kiwa yaichah.
Da ong u leh wa kani ka sngi u man ko ka sngi wow sah kynmoo neibhah i yakhih ka seiñ iwa da neh la kamwa ar bnai da man i iwa jop ha kani ka kynti.
U Ribok Biam uwa man kam u President ka JSM Western Region da ong u wa ka seiñ da kyrchaan ko ya i yakhih ka JYF deiwa kyntu ya ka sorkar wa ha ki snem wow wan ymtoh de wow em kam ini wei da kyntu ya ka sorkar wow pynheh ya ki Classroom wei wow thung ya kiwa sikai wei da kyntu u leh ya ki khynnah kiwa da minot ha i puræ yong ki.
