Ka Jaiñtia Youth Federation (Central Body) da lai pait ko ya u sarok cha ki thaaiñ War Jaiñtia hapoh i yahkhmat u General Secretary ka seiñ, u S. Pajuh wei da chem ko wa da sih ware u sarok iwa da ktah joor ya ki bru khamtam hawa kit ya ki bru wa kjut cha ki thaw sumaar.
Ka seiñ da chem ko wa u sarok da sih bha u nadooh na Yingkieñ Myntdu (Treionriang) chadooh Muphlang wei nadooh na Amlarem, Pdengshakap, Amlari, Muktapur ter ter chadooh Lumpyngngap wa u sarok khappood wa ka Bangladesh nadooh na Muktapur ter ter chadooh Dawki.
Neiliang ka seiñ da kylli ko na ka sorkar MDA wa na u MLA ka thaaiñ lada hoi u klam manla i por na ki rynsan ya i roi i paar katwa u sarok won da ieh khlem chna da boon snem.
Da kyntu ko ya u MLA ka thaaiñ wow chimkhia wow pait ya ki sarok wei wow chna noh ya ki wow pynsuk wow myntoi ki paidbah neibhah lada sih u sarok i lut leh rap joor i khantam wa da sy’ad i phniang kari.
