Jowai: Ka Jaiñtia Youth Federation-CB, lyngba u Working President, u Niwasly Rymbai, da pynsñiaw ki yei sñiawkhia hajrong i wan tia ki baar jylla chapoh kani ka jylla ha kini ki sngi, khamtam hawa ka jylla Assam da pynkrehkaam ko ya ka NRC.
U Rymbai da ong u wa ym du ha ini i por wa i wan psiah ki baar jylla da jia i tangwa wei da em leh kiwa da chah ksoh kiwa chah pynuiñ biang ki ha ki seiñbhalang wa ki bor ka District tangwa da em leh kiwa lait kiwa da yoh laad wow psiah chapoh ka jylla hanlada da pynman yei paitsiar. Ye u man wa i thmu yong ki ymtoh du wow kreh wei lada yohlaad wow chong buhai chnong wei wow man leh kam ki tre chnong chi rta.
Kamtæ khnang wym em uwon uwon u baar jylla wow yohlaad wow buhai chnong ha kani ka ri loom, ka JYF da kyntu ko ya ki bor ka District Administration wow paitngor wei wow pait bniah ya i wan tooid ki bru na baar jylla chapoh ka jylla Meghalaya.
Ka JYF ka kyntu ko khamtam ya waroh ki waheh chnong, ki Secretary chnong wa ki seiñ khynroo wa em hapoh ka ri-loom Jaiñtia wow pait bha ya ki baar jylla wa wan kreh cha ki chnong ki thaw yong ki lada biang ki ya ki kot ki sla yow tip tre neiwon wan ki wei lada toh u man ki ki bru wa hoi u e kreh.
Ka seiñ da kyntu ko leh ya ki waheh chnong toh u e yutip ki cha ki bor wa pait ya kani ka kaam, lada em iwon iwon i artatien ya uwon uwon u bru. Ka JYF da ong ko leh wa i krehlang yong waroh ki paaid ka ri loom Jaiñtia man ko kawa emkaam bha ha kam kini ki por.
Discussion about this post