Jowai : Ka KSU Narpuh Circle yow pynsñiawthooh ya ki khynnah wa dang em ha ki skur yei emkaam ki u neh ha skur yow pteiñ yei puræ puthi yong ki da pynman ki da ka e sikai hajrong ka phang “Early Drop Out, Early Marriage” ha Umkiang Holy Cross Higher Secondary School ha kani ka 9 tarik.
Da wan lang leh wa ki khynnah puræ ka Narpuh Modern English School heiwa ki ar ngut ki bru wa bniah bha ya ka phang ha kani ka sngi ka L. Thong Nibah na ka tnat District Social Welfare wa u P. Dkhar Supervisor ka District Social Welfare kiwa pynche cha ki khynnah yei ma wow ieh ya i puræ puthi ha chiteiñ por kamjooh leh yei smat yoh kurim.
Da e mynsien ya ki khynnah yow pteiñ ki ya i puræ puthi yong ki wei wym hoi u lai ki cha ka luti wa bakla yow yoh ki ka mynried wa bha wa tyrchaaiñ.
Ha kani ka sngi kam wow pynchlur ya ki khynnah puræ da saam khusnaam wa tip kam ka “5th Mait Shaphrang Award ” cha 32 ngut ki wa da leh bha ha ka Exam SSLC, HSSLC wa ka kyrdan Degree kiwa yoh 1st Division wa 2nd Division.
Ha kani ka sngi da emlang leh u Daniel Khyriem President KSU Seiñbei, Donal V Thabah Education Secretary KSU Seiñbei, Ohibait Dkhar President KSU JHDU wa ki dkhot ka KSU Khliehriat Circle, Narpuh Circle heiwa u Daniel Khyriem da man u kam u Kongsan katwa u Donald V Thabah kam u Symbood Kongsan.
U Daniel Khyriem hei klam yong oo kam u kongsan da kyntu u ya kiwa dang em hapyrdi i puræ puthi yow man ki kiwa minot yow wanrah ya i naam wa i burom ya ka thaiñ Narpuh. Da ong u leh wa da chynna bha wa da ku bha kani ka thaiñ ha i puræ puthi kamtæ da kyntu u ya wawoh wym hoi ki u pynsepai ya i por yong ki.
Discussion about this post