Ka KSU da e khublei ko yaka MLA ka Sutnga-Saipung Constituency, ka Santa Mary Shylla yei wanrah ko yaka phang heiyatoh waka Industrial Training Institute (ITI) Khliehriat ha yung dorbar chna aiñ ka jylla haka 19 tarik yow dawa pynkrehkaam noh ka, heiwa haka heiwa ka 21 tarik da yoh yei jubab na u Montri Rangbah, u Conrad K Sangma.
U Conrad da pyntip u wa heiyatoh waka ITI Khliehriat da pynmih Advertisement yow khut ya kiwa wan puræ wei daw sdang wow e hikai nadooh u Naiynru uni u snem katwa ka yung thymme won daw pyndep u chna chwa u Naikhynde uni hi u snem.
Neiliang ka seiñ ynnin u snem da dep thoh ko cha waroh ar ki MLA ka thaaiñ yow pynkrehkaam noh ya kani ka ITI deiwa dawa wow booh 19 tylli ki jait hikai yow man kam ki Stenographer, Plumber, Welder, Fitter, Wireman, Electrician, Fruit & Vegetable Processing, Mechanic Motor Vehicle, Draughtman Civil, System Maintenance, Carpentry, Digital Photography, Bakery & Confectionery, Masonry wa kiwi kiwi de.
Ka seiñ da e khublei ko leh yaka sorkar wa da leh ko yeiwa emkaam neibynta iwa angnood ki paidbah. Kamtæ ka seiñ da kyntu ko ya ki khon khynroo khyllood wow pynkhreh ki ya idæ yow pynpsiah ha kani ka chlem e sikai yow lait ko u sepai wei wow kreh minot ki ha kiwon kiwon ki kaam wa da jied ki wow chah hikai.
Discussion about this post