Kyntu ka KSU ya kiwa uiñke cha ka kchaaid Khaddum wow man kiwa lehkhooid

Ka Khasi Students’ Union (KSU) Narpuh Circle da kyntu ko ya kiwa wanke cha Chympe, Khaddum wow yait nei pyntngit yaka rymaw deiwa pynkhooid ya ki thaw hadien wa da dep baam. Neibhah i khooid ka rymaw man ko kawa emkaam tam ya i uwi pa uwi.

Ka seiñ da ong ko wa ha i lai pait ya katai ka thaw wa miat wa em ha Khaddum da chem wa man ko kawa jakhlia iwa ym em yoosuk u yoo. Kamtæ chwa wow mih na katai ka thaw, ki dkhot da pynman ki yei pynkhooid deiwa lum ya ki Plastic, ki klong um wa kiwi kiwi wa da noh roi da kiwa wanke wei da pyllang chi thaw dep te thang noh yaki.

Ya ini da leh da ki dkhot ka seiñ hapoh i yahkhmat u KS Suchiang, President KSU Narpuh uwa man leh u Environment Secretary ka KSU JHDU, u Sanatomba Bamon, General Secretary hei ya emlang u Ohibait Dkhar, President KSU JHDU wa kiwi de ki dkhot.

Ini i pynkhooid man ko ka nongmuna wa bha ya kiwi, khnang wow dam nei leh taroi yaka rymaw wei wow burom ya ka bei rymaw wa e sñiawbha uwa booh wa thaw.