Jowai: Ka seiñ Kyntoilang Self Help Group, kawa kreh neibynta i bha i miat ka imlang ka chnong Nongtalang, da pynman ko ya ka yalang paidbah wow e sikai yei emkaam wow pynneh wei wow pynsah ya ka rymaw ha ka Community Hall ka chnong Nongtalang haka 31 tarik u bnai wa da dep.
Ya kani ka e sikai da pynman deiwa kyrchaan poisa ka yungkrehkaam u Planning Officer ka West Jaiñtia Hills District, Jowai.
Ha ka yalang wa wan chimbynta da waroh ki skur kiwa em hapoh ka chnong Nongtalang, da yoh ya i klam nyngkong na u K.L. Giri uwa man kam u Headmaster ka Nongtalang Government Secondary School, Nongtalang uwa man leh kam u kongsan.
Ha i klam u kongsan da ong u wa kiwa sikai sayan da pynche ki chaphang kiwa boon yow ban joor yeiwa emkaam wow sniawthooh ya i ktien ‘Environment.’ Da ong u wa ka ktien Environment haka ktien phareng man ko ka ktien wa yaar wa kawa yillu bha tangwa iwa suk dooh wow sniawthooh ya ini i ktein toh ka rymaw kawa ker soodong ya i kawa pynbiang ya iwa emkaam i waroh kam ki jhoor ki jhep wa iwa emkaam ki bru hadooh ki marad wow baam.
Ha kani ka sngi da yoh leh yei klam na u H.H. Mohrmen uwa da klam hajrong i ma kawa yang ya ki bru ha waroh kawi ka pyrthai neidaw wa joor i tympra pynjæd ya ka rymaw.
Ha chwa ini da yoh leh yei klam na u Phyrnai Lyngdoh uwa man kam u Secretary yong kani ka SHG uwa da batai leh yei lai luti yong kani ka SHG kawa da em katu la 10 snem wei da yarap ko wow e ram para ki dkhot yong ka wei da ye leh u pynlai ya kawi ka skur hapoh ka chnong.
Kiwi de kiwa klam ha ka yalang kiwa pynsniawthooh paidbah toh u H.B. Rymbui uwa man u waheh chnong ka Dorbar Chnong Nongtalang Mission wei ya ka yalang da pynlai da u H.F. Rymbui uwa man kam uwa e buit ka Kyntoilang SHG, Nongtalang Mission.
Discussion about this post