Ka Khooid Yaka Wah Myntdu (KYWM) deiwa kmen wa ka-it mynsien wow pynemwarom lang chirup ya sngikha u Jisu Christ heijooh i por u lehkmen i ya u snem u warim 2021 wei u pdiang ya u snem uwa thymme 2022 deiwa pyrkhat wa i mynsien yow nang im i sñiaw yong bru, yow nang chait nang khlan chooh chooh i im ka yong i ki bru chirup wa kiwa im ha tawiar ka Wah Myntdu kamjooh ha ki Ri-loom Jaiñtia wa ka ri yong i waroh kawi da booh yei kyrpaad wow pyrkhat yaka Beirymaw ha kini ki por lehkmen.
Kamtæ yow yoh um da kawa khooid, yow lait u tngit ka la’er manda riñ mynsien, yow neh ka khyndaw, yow chngaaiñ i im manda tymmen manda heh ki khon ki khonruid ki yong i, kamtæ ka seiñ da kyrpaad ko ya waroh kiwa chong chnong ha tawiar ka Wah Myntdu wow sñiawbha pynemwarom ya kani ka Christmas wa u pdiang ya u snem thymme deiwa u dam noh i u pynemkaam da ki khuri Plastic hawa dih cha, ki klong um-dih Plastic hawa dih um, ki pliang Plastic, wow dam noh u tympiah ya ki klong kiad ha i lehkmen leh sñiawbha ha yung namo ha ki yalang paidbah namo hawa lai baamdoh cha loom khamtam ha waroh ki bynta yong ka Wah Myntdu, yow lait kini ki klong piah u dung u ah ya ki warep kamjooh ha ki thaw paidbah.
Da kyrpaad ya waroh ki manpa ki manbei wow yaleh u pynchlur ya ki khon ki khonruid ki yong phi yow dam noh ki u noh ya ki Plastic thap baam kat cha wa ngait.
Da kyntu leh ya phi waroh wow ya krehlang chirup chirup kam ki bru kiwa im kiwa sñiawthooh ya i man kyntang iwa booh u Blai ya i heini ha pyrthai kawa man ka yung kawa chngaaiñ dei bor dei mynsien ka Beirymaw. Ya itæ i im wa chngaaiñ wa chait, u man i lada dang sñiaw mantre i ya ini iwa da booh kyntang u Blai yow ya imlang sahlang i chirup, katwa dang im i heini ha pyrthai.
