Ka Khooid Ya Ka Wah Myntdu kam kawi na ki seiñ kreh mon sñiawbha yong kiwa chong chnong ka Jowai kawa da mih chakhmat ha kini ki sngi wow klam u dawa yei hok ka wah Myntdu wa ki bru wa im talawiar yong ka.
Da lai luti ko wow kreh yei kaam wei da kwah ko leh wow yoh yei yakrehlang na ki dorbar chnong waphær deilang ki paidbah wa chong chnong, kamtæ ha ka thong wa ong “Save River Myntdu, Save Water, Save Humanity, Save Life” ha kani ka 14 tarik wa ka 16 tarik uni u bnai, ka seiñ da yoh ko wow li klam pynsñiawthooh ya ki paidbah ha Mynthong wa ha Loomiongkjam.
U Khroo L Pariat, President kam u President ka seiñ ha man ki yalang pynsñiawthooh paidbah, da e u ki kyntien yahkhmat deiwa khana pynsñiaw hakhap u waboon walang chaphang i lai luti ka seiñ nadooh u snem 2021 wow yaklam yasaaid wa ki bor sorkar ha ka thong wow e yada ki ya ka wah Myntdu neibynta wow chngaaiñ ki bru wa im talawiar yong ka.
U G.H. Bareh hawa klam ha Loomiongkjam da ong u, ka wah Myntdu kamwa da wan ko da ka hukum Blai, e ko chiboon i kyrkhu ya i ki bru wa im talawiar yong ka katwa i won ki bru wa yoh myntoi na ka ymtip i u burom kheiñkor yei man kyntang kyrpang yong ka, heiwa boon napyrdi kiwa chong chnong ym bien ki wow mih chakhmat u klam, u yakrehlang neibynta wow yoh bor yoh mynsien ka seiñ hei wow ood u naam wei wow pynbor ya ka sorkar yow leh ko yeiwa emkaam neibynta ka wah Myntdu kawa ha kini ki sngi yoo sakhiat da em ko hei maa wa khroo wa yang lada kam kiwa chong chnong ka Jowai ym khyrngiat yong bru i wow leh iyi iyi.
Ka Juliana Challam won hei klam kam kawi na ki manbei ka chnong Loomiongkjam, ong ko katni ki sngi ka wah Myntdu da yaam da kiaad ko neidaw wa i ki bru pyrthai ymtip de i u kheiñkor kheiñ burom ya ka kam katæ ka wah wa da wan da ka hukum Blai wow kær u da yei chnong Jowai.
Kam ka manbei wa dap dei khia pyrkhat yei man ka wah Myntdu, kyrsu kyntu ko ya ki para manbei wow yaleh katwa ye u yait, u syndong nei noh taroi yei jhep ki jaklia kiwa mih na man ki yung ki sem næ ki yung chet-ja yong i wei deiwa ye u leh kamtæ yooluti ko wow man chibynta ka laad wow yada ya ka wah myntdu.
Chooh chooh kyrsu kyntu ko ya ki khon ka dorbar chnong waroh wow man kiwa da pynkhreh u yakrehlang wa ka seiñ Khooid Ya Ka Myntdu ha kiwon kiwon ki por khnang yow nang yoh bor yoh mynsien ka seiñ u kreh wei wow dawa yei hok ka Myntdu nakhmat ki bor sorkar.
Khaddooh ya kani ka yalang da pynkut deiwa yoh ki kyntien e mynsien wa ki kyntien khublei na u D. Manar uwa man leh uwi na ki khon khynroo ka chnong ka Jowai uwa da pynmih yei parom ka wah Myntdu ha ka puræ puthi.
Discussion about this post