Ka Meghalaya Joint Action Committee of Commercial Vehicles (MJACCV) ynne ka sngi da pynbna ko da ka yakhih wa eh hadien wa ka sorkar jylla leh mutlop ko dei wym khut yaklam ko ya kiwa yah kari kamai wot hadien wa da sangngeh kamai kattu la 10 sngi.
U Wandonbok Jyrwa uwa man u Chairman ka MJACCV ynne ka sngi da pynbna u ya ka yakhih wa 48 kynta ka wow sdang nadooh kani ka 15 tarik itæ nadooh 5 waje i step, deiwa kyntu leh ya ki paidbah wow e kyrchaan deiwa ym toh wow sai kari cha sarok da 48 kynta.
Hawa kylli, da pyntip u wa hadien ini i yakhih wa 48 kynta, lada ka sorkar dang pteiñ ko wow suki hi-eh wei ym leh iyi iyi, neiliang kiwa yah kari na waroh kawi ka jylla daw lai chah thngan ki hakhmat ka Secretariat.
Da ong u wa ka MJACCV ym tipmit ko ya kiwi ki kynhun kiwa lai yachem ya ka ki bor pynlai District, kiwa pynkiñ ya ki paidbah wow pyrkhat du ya idæ, tangwa ka JAC u lai ko chakhmat ya ki yakhih.
Hawa kylli chooh chooh, u Jyrwa da ong u wa lada ka sorkar ka pyndooh ko ya ka Permit ka yong ki, ki biang hi ki wei kiwa em kari daw kamai Private noh ki.
