Kyntu ka Mothers’ Union ya ka sorkar wow chimkhia ya ki kaam wa man pyrchah ya ki kynthai wa khynnah

Shillong: Ynne ka sngi, ka Mothers’ Union, Tura chirup wa ki kattu katni ki bru samen na ri-loom Garo da e dorkhat ki cha u Montri Rangbah ka jylla, u Conrad K. Sangma, u montri ka kaam pohyung, u James K. Sangma wa kiwi kiwi ki montri ka sorkar wow pynsñiaw yei mynsien wa khia hei yatoh wa ki kaam wa man pyrchah ya ki kynthai wa ki khynnah hapoh ka ri-loom Garo heiwa du hapoh ar tayaw da em 6-7 tylli ki kaam pyrchah ya ki kynthai. Ka seiñ da kyrmen ko wa lyngba kani ka dorkhat daw chimkhia ki bor sorkar yeini nadooh ki pulit, ki yung kasari wot hadooh ki thaw sumaar.

Da beiñ joor ki ya ki bru wa chim kabu, kiwa leh ya kam kini ki kaam kiwa da pynsyir mynsien ya kiwa boon hapoh ka jylla.

Da ong wa i pynchitom ya ki kynthai ha khap paidbah (moral policing) wanrah ko yei im suk ki kynthai wa ki khynnah ha kylleiñ ka jylla wei khamtam ya kiwa saam paidbah yngba ki Social Media ya ki kaam wa man pyrchah ya ki kynthai.

Ka seiñ da kyntu ko ya ki montri, ki heh sorkar, ki pulit wa ki yung kasari wow chimkhia yeini wei ymtoh u leh lakam wa ym em jia ini waroh.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha ka dorkhat da kyntu ko wow pynkreh hok ya ki kyndon ka aiñ khnang wa uwa leh bakla u chah pynchitom u, wow pynkhlan wei wow booh ya ki pulit kynthai namo ki Women Police Cell ha waroh ki District ki wow biang ki tiar ki tar hawa pynman ya ki takit, wa kiwi kiwi.

Wow thung wei wow esikai ya ki wa sumaar namo ki Medical Officer ki wow kreh hok ya ki kaam yong ki kiwa yatoh wa ki kynthai, wow chna ya ki kyndon wow bood hawa sylli namo examine ya ki wa chah ktah wei wow pyllang ya ki sabut ha ki thaw sumaar lada ha sorkar næ nongkyndong, wow booh ya ki yung kasari wa kyrpang namo ki Special Court wei wow thung ya kiwa bichaar wa kyrpang (Special Judge) wow bichaar ya ki mukotduma wa yatoh wa ka POCSO wa VAW.

Ka seiñ da e yumut ko leh wow pynman ya ki program wow pynsñiawthooh paidbah heiyatoh wa ki hok ki kynthai, wow esikai ya ki muktiar, ki pulit, ki Doctor sorkar, ki seiñbhalang wa kiwi kiwi heiyatoh wa kini ki kaam.

Da ong ko wa ka ki kaam pyrchah ya ki kynthai da ktah ko ya i man i long ki kynthai, i bor pyrkhat wa kiwi kiwi, kamtæ kyrmen ko wa ka jylla Meghalaya u man ko kawi na ki jylla wa yahkhmat ya ka ri wow yakhun ya ki kaam wa pyrchah ya ki kynthai wa ki khynnah.