Khliehriat: U sarok Syrbang da booh u hei maa ya ar tylli ki Elaka kitæ ka Elaka Sutnga waka Elaka Sumer neidaw wa ieh ka sorkar oo khlem pynchna hadien wa joor u slap ha kini ki tayaw wa da dep heiwa da em ki bynta uni u sarok da oor noh u.
Haka 19 tarik uni u bnai, ka Meghalaya People United front (MPUF) East Jaiñtia Hills District, hadien wa da yoh ko yaki ujor naki paidbah katai ka Elaka da hiar ko cha katai ki thaaiñ wow sylli ya katai ka sarok hei yahkhmat u Michal Chyrmang uwa man u President ka MPUF EJHD, hei em lang u President ka Khliehriat Circle u Kyrshan Blah, u President ka San Chnong Circle u Juny Phawa wa ki dkhot ki yong ka.
U Michal Chyrmang u President ka (MPUF-EJHD) hawa klam wa kiwa thoh khubor da ong u, “Ym ye de O khlem da pynsñiaw yei sñiawdiaw hadooh kattæ kattæ neidaw waka sorkar wym chna ko ya uni u sarok uwa oor la kam chi bnai kattu neidaw wa joor u slap”, da booh u leh yei kyntu yaka sorkar waka chnat PWD wow chna smat ko ya uni u sarok wa pynyabi nadooh ka chnong Sutnga hadooh ka chnong Pala, Jalaphet, deiwa ong leh wa u sarok man u uwa emkaam hadooh kattæ kattæ ya u paidbah la haka lai ka wan, ha i por miet por doom khamtam ha i por kjut por chitom. “Lada ka sorkar ym chna ko ya uni u sarok lada jia em iwon iwon i jia ha uni u sarok, ka sorkar toh u bah khlieh ko yeitæ.”
Chooh chooh da ong u ka sorkar ym toh u pait ko du haki thaw sor, emkaam u pait lang ko waki thaaiñ nongkyndong, da kyntu u leh ya u MLA ka thaaiñ wow chimkhia u yeini i kaam neibynta i miat i bha yong u paidbah.
U Kyrshan Blah, President ka Khliehriat Circle da booh u ya i kyntu ya u Montri yong ka chnat PWD u Prestone Tynsong uwa man leh u Deputy CM yong ka jylla Meghalaya wym toh u pait u du yaki thaw sor, emkaam u pait u cha ki thaaiñ nongkyndong khatam cha ka thaaiñ Jaiñtia Hills.
