Jowai: Hadien wa pynbna khubor yong ki kattu katni ki seiñ kiwa sikai SSA wow Boycott ya ka sngi wa kyrpang kiwa sikai ka wow lehkmen ha kani ka 5 tarik uni u bnai, ka seiñ kiwa sikai SSA hapoh ka jylla ka Meghalaya SSA School Association (MSSASA) ynne ka sngi da kyntu ko ya kiwa sikai skur SSA wym hoi ki u dam ki u chimbynta ha ka Teacher’s Day kiwa em hapoh ka lama yong ka wa kamjooh leh ya waroh ki 12541 ngut kiwa sikai wow dam ki u lai chimbynta ha kiwon kiwon ki yakhih wa pynman da ka AMSSATA.
“Kamwa man kattæ kam kiwa sikai toh u sniawthooh ym ye wow pyndooh ya waroh i eh i chitom khamtam ha kini ki por waka sorkar lyngba ka tnat puræ puthi da kreh chitom ko wow pyndooh noh yei duna wei wow pynkylla thymme ya ki kyndon yong ka Integrated Scheme Samagra Shiksha Abhiyan,” ong u Aristotle C Rymbai, President ka MSSASA seiñbei.
U Aristotle da pyntip u leh wa ka State Planning Board wa khlieh da u Lambor Malngiang kam u Chairman dang ha ka 28 tarik u bnai wa da dep da khut ko ya kiwa yahkhmat ka MSSASA wow ya phyllu yumut wow yaklam sani hajrong ki phang dawa ka seiñ kiwa kynthup nadooh ka tulop yong kiwa sikai SSA, wa kynthup lang na ka State Implementation Society cha ka tnat puræ puthi ka sorkar jylla wow pynskem ya ka chakri yong ki nalor kiwi kiwi ki mat dawa neibynta i bha i miat yong kiwa sikai SSA.
Ka State Planning Board ha ka yalang wa ka tnat puræ puthi ha ka 29 tarik u bnai wa dadep da chong pyrkhat bniah ki yeiwa pynsniaw ka MSSASA wei da phah leh ya ka tnat puræ puthi wow kdaw che ki hajrong i long i man yeiwa sah ka tulop wa 5 bnai kiwa sikai SSA.
Ka seiñ da pynsniaw ko yei sniawkhia wa emkaam jhan wow pynskem ya ka chakri yong kiwa sikai SSA wei kamjooh leh wow kyntu ya ka puræ puthi ha ka jylla wow pynbiang leh ya ka su tulop wei wow pynpsiah leh ya kini hapoh ka Education Policy ka sorkar.
Discussion about this post