Kawi na ki muktiar wa pawnaam ka ri, ka Indira Jaising da kyntu ko ya ka bei ka Nirbhaya ka Asha Devi wow bood ya ka nongmuna ka Sonia Gandhi deiwow maap ya ki 4 ngut kiwa da chah rai pasi hajrong i chah slaitbor ka khon yong ka (Asha Devi) ha u snem 2012 ha nongbah Delhi.
Ynnin, ka Asha Devi da beiñ ko ya ka yung kasari wa ka sorkar deiwa ong wa ki jooh ki bru ha u snem 2012 da yakhih ki neibynta i hok ki kynthai katni won da pynemkaam bakla ki ya i yap ka khon yong ka neibynta i myntoi samen yong ki.
Ka Asha Devi da pynsñiaw ko yei sñiawkhia ya i rai ka yung kasari ka Delhi wow kyrriah tarik wow pasi ya kini ki 4 ngut.
Ka Indira Jaising da e nongmuna ko ya ka Sonia Gandhi kawa da maap ya ka Nalini ya kawa da chah rai pasi hajrong i emkti wow tynyap ya u montri rangbahdooh warim ka ri, u Rajiv Gandhi ha u 1991 wei katni ka Nalini da chah rai wow kset ya ka hadooh 28 snem.
Kam wow pynkynmoo heini, kini ki soo ngut wa da chah rai pasi wow slaitbor ya ka Nirbhaya toh u Pawan Kumar Gupta, u Akshay Thakur, Vinay Sharma wa u Mukesh Singh. Katkam wa man ka rai warim ka yung kasari da rai wow pasi ya ki ha ka 22 tarik uni u bnai heipor 7:00 i step tangwa da kyrriah noh ya ka tarik cha ka 1 Thohlakhmi heipor 6:00 i step.
Also Read: Rai ka kasari wow pasi ya ki 4 ngut wa emkti ha ka Nirbhaya Case
Discussion about this post