Ka North East Students’ Organisation (NESO) kawa kynthup ya ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) wa ka All Arunachal Pradesh Students’ Union (AAPSU) kiwa man ki seiñ na ka thaaiñ mihsngi da khyrngiat wei da beiñ joor ko yeiwa jia ha Manipur heiwa ka sorkar da beh ya ki jaitbru Zo iwa da bood won sei awri awra.
Da chah beh kini ki jaitbru toh hajrong i daw wa sah ki ha Reserve Forest tangwa hei sakhiat kini ki jaitbru da chong sah ki heini nadooh ki por nynde.
Kam wow kdaw heini ka sorkar Manipur ha u bnai wa dadep da thmu ko wow beh ya ki Khasi wa chong wa sah ha kini ki thaaiñ.
Chooh chooh ka NESO da ong ko wa ka sorkar Manipur toh u pdiang ko wa waroh kini ki jaitbru Ri-loom na thaaiñ mihsngi toh kiwa da chong da sah ha kini ki thaw na ki por nynde wei ymtoh u kheiñ ya ki kam ki nong Nepal næ Bangladesh.
Ka NESO da kyntu ko ya ka All Manipur Students’ Union (AMSU) wa ka Mizo Zirlai Pawl (MZP) wow krehlang chhirup wow lait na i awri yaphær jaitbru.
Neiliang u montri rangbah ka Manipur, u N. Biren Sing leh da kyntu u ya waroh kiwa chong chnong ka jylla wow krehlang wa ka sorkar neibhah i awri awra mih i nei sñiawthooh bakla donhi wei da khut leh ya ki chipai pulit wow wanrah yei chongsuk ha kini ki thaaiñ wa em i awri.
