Ka Seiñ Kynjei kawa man kawi na ki seiñ yong ki chi lok na Jowai, ynne ka sngi kam chibynta wow pynneh yei khooid i jngiar ya kawi na ki thaw uiñke ka Jowai, da pynman ko ya i pynkhooid ya ki bynta ka Wah Myntdu nadooh na Syntu Ksiar.
Ya ini i pynkhooid da pynman chirup i krehlang wa ka Dorbar Chnong Panaliar hajrong ka phang “Nature takes care of us, lets return the favour” namo iwa ong “Ka rymaw da sumaar ko ya i, to u sumaar kylliang i ya ka”.
Ha chwa wow sdang i pynkhooid da em ka yalang wa tbian wa da pynlai da u Arwanki Laloo uwa man u Secretary ka seiñ, da yoh i klam wa tbian na u dkhot yong ka u Kaida Thma wa na u waheh Chnong ka Panaliar u Riquoma Rq Laloo, wei da pynkut ya ka yalang da ki kyntien khublei na u Samha Oo Passah uwa man leh u dkhot ka seiñ.
Neiliang ka seiñ da kyntu ko ya ki paidbah wa wan uiñke wei kiwa wan baamdoh wow krehlang hei wow ye u wanrah yei khooid i jngiar ha kani ka thaw neibhah deiwa sdang pyn na-i dæ daw pynbor i ya kiwi wow man kiwa lehkhooid neibhah wa ym em kiwon kiwon ki bru kiwa kwah u laike cha ki thaw wa dap dei tngit wei jhep.
Chooh chooh da e khublei ko leh ya ka chnong Panaliar wa da yakrehlang ko wa ka ha kani ka sngi kamjooh leh kiwi ki bru samen kiwa da embynta lang wow pynman ya ka sngi kawa jop.
Ya ini i pynkhooid da sdang nadooh na Syntu Ksiar (Mot u Woh Kiang Nangbah) tymbud ka wah Myntdu hadooh ha Yingkieñ Pohkhyllem.
