Ka Thma U Rangli Juki (TUR) da beiñ joor ko hajrong i chah dat kiwa mylla ha ki thaaiñ Golflink ha kini ki kajiak sngi kiwa da dep heiwa uwi uwa na ka chnong Wahkaji da khlaad noh u. Wei ka TUR da pynman ko yei duwai wa kyrpang wei phah ko leh yei sñiawlem cha kiwa ha yung yong uwa da khlaad noh.
Ka TUR da dawa ko deiwa eh wa ki bor pulit u pynsmat ki yei takit hajrong ini i jia wei wow kem smat wei wow pynchitom ya kitu kiwa emkti ha ini i kaam damok.
Ka TUR da pynsñiaw ko leh yei sñiawkhia hajrong i roi ki kaam damok wei tynyap bru ha ka jylla hi waroh kawi. Ki tynyap bru, ki slaitbor ya ki khynnah kynthai kamjooh kiwa kaam wymman kiwa chyrkhei da pynsih ki yaka imlang sahlang ha ka jylla.
Kamtæ ka TUR da beiñ joor ko ya kitu kiwa emkti wei da khut ya ki para chong chnong wow man kiwa pait bniah wei ym toh wow tieñ u yieñ pyrchah ya ki kaam sih ki kam damok wa kam kini.
Ha i jooh i por ka TUR ka kyrpaad wei kyntu ko ya ki paidbah wym toh u chah yah bakla ha ki khubor thok kiwa ye wow yah bakla kiwa da bær da ki bih yow kheiñ sih wei wow yachoon para bru kawa ye wow wanrah leh yei kynaad hapyrdi ki para bru.
Ki kaam damok toh ki kaam damok, toh u beiñ joor wei toh u tem pyndooh katwa ye, da ong ka TUR, deiwa pynrap wa ka nongbah Shillong da lai ko lyngba ki eh wa ki jia kiwa sñiawsih kiwa boon ha ki snem wa da lai wei iyi wa emkaam katni toh wow ya krehlang neibynta i suk wei wow kyntu ya i yoh i kot kawa chong yurim ha ka synchaar hok, ka bichaar hok wei da iwa sakhiat.
