Ki 10 tylli ki seiñ ki jaitbru ri-loom wa kynthup ya ka Indigenous Tribal Leaders’ Forum (ITLF) ha ka 10 tarik uni u bnai da kyntu ki ya ki paidbah wow dam u chimbynta ha ka Election yong ki Autonomous District Council (ADC) ha Manipur.
Ka Manipur em ko 6 tylli ki ADC wow kreh neibynta i myntoi ki jaitbru ri-loom kiwa chakri ya 40% kiwa chong chnong ka Manipur na ki 3.2 Million ngut kiwa man ki jaitbru ri-loom heiwa kiwa boon toh ki Naga wa ki Kuki-Zo kiwa boon paaid dooh na ki 34 tylli ki jaitbru.
Ki chiphaw tylli ki seiñ da chim rai ki ha ka 14 tarik u Naichiphaw heiwa ka Hill Areas Committee (HAC) kawa man ka chnat yong ka Manipur Legislative Assembly, da tyrwa ko ya ka sorkar Manipur wow pynman ya ka Election cha ki ADC.
Ka Committee da rai ko leh wa khnang wow pynkrehkaam ya ki ADC emkaam u thung chwa ya kawi ka Committee wow em dkhot da ki 20 ngut ki Member na kawi ka ADC heiwa 18 ngut toh u man kiwa da chah jied, ki bru chemphang, ki bru wa thung da ka sorkar cha ki District kat hadooh wa da pynman ya ka Election ADC.
Ki 10 seiñ hawa e kyntien chirup da ong ki wa ka HAC toh u mihkhmat da ki bru ki wow pynmyntoi ya ki jaitbru ri-loom ha Manipur hei wow chna ya ki Committee wa chipor ya kawi ka ADC kat hadooh wa yoh u pynman Election.
Da long leh wa i rai ka HAC toh iwa ym ye wow pdiang neibhah ki MLA na ki jaitbru Kuki-Zo ym em u kynthup ya ki hei wow chim ya iwon iwon i rai.
“Hadien boon snem wa pynslem, wei leh katni, hapyrdi wa em i awri awra? Ka Election ADC wa khaddooh toh ha u 2016 wei nadooh itæ i por ym em de man Election cha ki ADC wa toh u pynman da ka sorkar Manipur”, da ong kini ki seiñ.
Da kam leh wa ki ADC da chah pyndooh poisa ki wei man iwa eh ya ki wow pyndep ki yei kaamram yong ki wei ini pynyoo i yei kheiñstiñ ka sorkar ya ki thaw ri-loom.
Chooh chooh da ong wa hadien wa dooh ya kiwa boon ki mynsien, i chah tympiah tympdung, wa i chah lehbeiñ ha ka sorkar da mut kow wow pynman da ka Election yow pynmylliñ yeiwa da jia, da pynbaan kini ki seiñ.
Kamtæ da kyntu ya ki paidbah wow dam u chimbynta ha ka Election ADC kat hadooh wympu yoh yeiwa da dawa ki na ka sorkar.
Neiliang ka Liang pyrchah, ka Congress da pynbaad ko wa ka sorkar BJP ha ka jylla toh kawa pyrchah ya ki jaitbru Ri-loom deiwa dam u pynman ya ka Election ADC la soo snem kattu.
U President ka Congress, u Keisham Meghachandra Singh da ong u wa ka sorkar BJP da leh chynnam ko wym toh u pynman ya ka Election cha ki ADC la soo snem kattu.
Da beiñ u leh ya i rai ka HAC iwa man pyrchah ya ka riti synchaar ka ri, iwa man pyrchah aiñ.
Chooh chooh da ong u wa deiwa dam u pynman ya ka Election ADC la 4 snem kattu da ktah i yei pynkrehkaam ya ki Scheme ka sorkar pyrdi wa yatoh wa ki ADC wa na ka Finance Commission.
Ka Election wa khaddooh cha ki ADC toh wa da pynman ha u 2015 heipor wa dang synchaar ka Congress ha ka jylla wei ka samoi ki 6 ADC kut ko ha u 2020.
Discussion about this post