Hadien wa da thut i lai i wan kiwa uiñke suwari cha Meghalaya deiwa pynliwan ka HNYF ya ki kari ha ka 26 tarik uni u bnai iwa da ktah yei kamai kajih ki bru wa em ha ki kaam wow pdiang ya kiwa uiñke suwari heiwa da ong ki wa da dooh noh ki hadooh 30%.
Neiliang ka Tour Operators Association of Meghalaya (TOAM) da ong ko wa kattæ waroh da sdang man i kamjooh hi ka yoh nong.
Ynne neiliang ka TOAM da phah chithi ko cha u Montri ka chnat Tourism, u Paul Lyngdoh, yow kyntu u wanrah ki Policy yow pynbait ya kam kini ki kaam. Da ong ki deiwa joor wan ki kari kiwa na baar jylla wei deiwa kwah kiwa uiñke suwari u chim da ki kari Assam, da ktah ko ya kitu ki kari wa kamai ha Meghalaya.
Neiliang u Banlum Blah, dkhot ka TOAM da e buit u wow em i ya krehlang hapyrdi kiwa kamai kari ha waroh ar jylla.
Da ong u leh wa yow lait ki kari kiwa na baar jylla u chim kabu, ka sorkar toh u pynkrehkaam ko deiwa bood yeiwa leh ha Sikkim yow lait u thut i lai i wan ki bru neibhah emkaam wow pynemkaam da ki kari kiwa napoh ka jylla yow pynku ya ka kamai kajih.
Ka TOAM da ong ko wym miat u khang ya ki kari wa wan na baar jylla wei da khut ki ya ka sorkar wow pyrkhat bniah yeini yow ku lang waroh.
Discussion about this post