Ka seiñ kiwa kamai Truck hapoh ka lama yong ka Joint Action Committee (JAC ) kawa kynthup ya ka All Jaiñtia Cement and Clinker Association (AJCCTA) wa ka Meghalaya Truckers’ Union (MTU) ynne ka sngi da khut pynman ko ya ka yalang wow yaklam hajrong i eh i khoo wa chem kiwa kamai truck.
Ya kani ka yalang da pynlai da u Justine Phawa kam u Convener heiwa ki tre Truck kiwa da wan cha kani ka yalang da rai ki wow pynkhlan chooh chooh ya ka JAC deiwa kynthup lang leh ya ka Jaiñtia Hills Truck Owners Association (JHTOA) kamwa da man nachwa.
Da rai leh wow pynman biang ya ka yalang ha ka 15 tarik uni u bnai deiwa khut leh ya u President, Secretary wa kiwi kiwa kitkaam ka JAC.
U Justine Phawa hawa e yei klam da ong u wa da rai wow khut ya kani ka yalang yong ka JAC deiwa kyrpaad ya ki heh ka JAC (President wa Secretary) wow embynta biang ki ha kani ka yalang khnang wa ki kaam ka JAC u man ki kiwa lai bait kamwa da yooluti nadooh wa sdang ya ka.
Chooh chooh da kyntu u ya ki heh ka JAC wow wan ki cha kani ka yalang wow pynbait ya i kaam neibynta i bha i miat kiwa kamai wa ki tre ki Truck.
U Balen Thubru, President ka AJCCTA da ong u wa da yoh yei tyrwa na ki tre Truck wow khut biang ya ka yalang ha kani ka 15 tarik uni u bnai wow emlang waroh kiwa kitkaam ka JAC khnang wa ki kaam u man ki kiwa lai bait kam nachwa.
U President ka MTU u Monte Ranglong da ong u wa emkaam wow em i yatylli wei da kyrmen u wa daw yoh biang ya i krehlang chirup na waroh ki le seiñ kamwa man ha ini i por wa dadep.
