Jowai: Katkam wa man katni i khang chnong wei booh kyndon ya ki dukan neidaw ka khlam COVID-19 da ktah i ya kiwa boon, wei kamjooh leh ki bru wa dai tim kawa man kawi na ki khih kawa yarap chiboon ha ka yarong poisa ka sorkar da chah ktah bha ki.
Ynne ka sngi deiwa chimkhia yeini waroh, neiliang ka seiñ kiwa dai tim wa tip kam ka “Khon Ka Ripnar Daitim Association” (KRDA) da lai yachem ko wow DC ka West Jaiñtia Hills, u Garod LNS Dykes.
Ha ini i lai yachem da yahkhmat da u MLA ka Jowai, u Wailadmiki Shylla, chirup wa u President ka KRDA, u Khroo Shylla wa u Secretary ka seiñ, u Iatha Passah.
Neiliang ka seiñ da pynsñiaw ko ha u DC yei chem chitom yong ki dkhot yong ka neibhah wa em boon ngut kiwa imja na ini i khih i kreh wei i emkaam wow chah wow wai biang ya ki dukan (dai tim) man ka sngi kamwa jooh man neipor wa dadep.
Hadien i yachem, neiliang u DC da kular u wow chimkhia yeini i kaam wow pynsuk ya waroh deiwa rah yeini cha ki bor sorkar wa hajrong.
Heijooh i por ka seiñ da kular ko leh wa ki dukan kiwa em hapoh ka satri yong ka, u bood ki ya ki kyndon wa da booh ka sorkar heiyatoh waka khlam COVID-19 wa kiwi kiwi ki kyndon wa pynmih neipor cheipor da ka sorkar.
Khaddooh ka seiñ da ekhublei ko leh ya u Wailadmiki Shylla yei kyllooid mynsien yong oo wow pyrkhat jngai yarap ya kiwa imja na ini i khih i kreh, deiwa engooh ya u Blai wow e u ya oo yei doh i pran wa chait wa khiah khnang wow ye chooh u wow e i chakri ya ki paidbah ka Ri-loom Jaiñtia wa ka jylla hi waroh kawi.
