Ka Khasi Jaintia Deficit School Teachers’ Association (KJDSTA) wa ka Garo Hills Deficit School Teachers & Employees Association (GHDSTEA) ha ka sngi Balang da kyntu ki ya ka sorkar jylla wow yada yei myntoi kiwa sikai skur Deficit hawa pynkrehkaam ya ka rukom su tulop wa thymme (New Pay Structure) wa hawa pynwandur ya ka Categorization Policy.
Hawa e kti ya ka dorkhat cha u Montri ka chnat puræ puthi, u Lahkmen Rymbui, neiliang ka KJDSTA wa GHDSTEA da ong ki wa kam kiwa sikai da pynsñiaw ki yei sñiawkhia hajrong i thmu ka sorkar wow booh noh du ar tylli ki jait skur wa da pynbna ha u October 2025, wei da kyrpaad ki ya ka sorkar wow pyntikna yei thmu wow pynkrehkaam ya ar jait ki kyrdan namo ki Category ki skur wa kiwi sikai khang wym ktah ko ha iwon iwon i rukom ya kiwa man kam kiwa sikai Deficit.
Hawa pynsñiaw ya ki kattu katni ki mat ki wym pu ye u pynbait kiwa ktah ya kiwa sikai Deficit, ki Association yong kiwa sikai da ong ki wa kiwa kreh sorkar yoh ki 49% ka DA wei kawa dang dep pynku ini wa dep cha ka 51%, tangwa kiwa sikai Deficit hadooh ynne dang yoh ki 43% ka DA deiwa kdaw leh wa hadooh kattæ ym pu yoh ki ya ka Arrear.
Kini ki seiñ kiwa sikai da pynsñiaw ki leh wa kiwa sikai kiwa da psiah kreh rap hachwa ka 1 tarik u April 2010 ym pu yoh ki ya ka Centralized Provident Fund (CPF) wei da kyrpaad ki ya ka sorkar wow leh iyi iyi smat wei wow pynsmat yei pynlait ya kani ka Scheme.
Hawa yatoh wa i yoh tulop Online lyngba ka MEGH‐SIMS Portal, ki Association da ong ki wa em i duna i krehkaam iwa man i daw wa slem wow yoh tulop wei na ini i daw da dawa na ka sorkar wow pynsangeh yei pynpsiah pyrtuid chwa chipor kat hadooh wa da pynbait yei rukom krehkaam.
Ka KJDSTA wa GHDSTEA da kyntu ki ya u Montri ka chnat puræ puthi wow chimkhia ya kini ki mat kam ki mat wa kongsan tam kiwa ktah ya kiwa sikai, i eh ha ka liang poisa tangka wa i long i man ka puræ puthi ha Meghalaya.
Discussion about this post