U montri rangbah ka jylla, u Conrad Sangma ynne ka sngi hawa yaklam wa kiwa pathai khubor hadien wa kut ka yalang ha Iooksi, West Jaiñtia Hills da ong u wa katni ka jylla da yoh ko ya ki dawai yada COVID-19 wei hadooh ynne ka sngi dadep e ya ini i dawai cha ki 3,800 tam ngut kiwa kreh ha i chait i khiah heiwa da booh thong wow e dawai cha ki 70,000 ngut ha ki tayaw wow wan.
Da ong u wa hadooh ynne ka sngi na kiwa da yoh ya i dawai ym em wa chah ktah deiwi dei ar wei wot ka sorkar pyrdi leh pynksan ko yei miat kini ki dawai.
U Conrad da kyntu u leh ya kiwa kreh ha i chait i khiah neibynta i bha yong ki wa ka yung ka sem yong ki emkaam wow chim ya i dawai.
Da ong u leh wa daw tip yei krehkaam ki dawai toh hadien wa e ya i dawai ha ka sien wa ar (Second Dose) wei daw leh ya ki Antibody Test.
