Ki dkhot ka Joint Action Committee Fencing of Borders Hingaria (JAC-FBH) hapoh i yahkhmat u President, u Marshall Biam, u Waheh Chnong ka Hingaria u Moses Khonglam wa u Secretary Chnong ka Hingaria u Tamius Surong ha ka 15 tarik uni u bnai da lai yachem ki ya u Deputy Commissioner ka East Jaiñtia Hills District, u E. Kharmalki wow yaklam hajrong i kaam wa dang sah wa yatoh wa i kær naar-chieh ha khappood ka ri India wa Bangladesh kiwa haap hapoh ka chnong Hingaria.
Hadien ini neiliang u Deputy Commissioner ha ka 17 tarik uni u bnai u bnai da phah chithi u cha u Waheh Chnong wa Secretary Chnong Hingaria wow kyrpaad biang ya ki wow elaad biang ya ka National Border Construction Company (NBCC) hadooh u Wisu (March) 2021 wow pteiñ ko ya kreh ha ka chnong.
Hajrong ini neiliang ki dkhot ka JAC da ong ki wa u Deputy Commissioner da pynche u wa ki bor pynlai District ka East Jaiñtia Hills dadep thoh ki cha ka Ministry of Home Affairs ka sorkar pyrdi wow su bai thaw cha ki tre chnong hapoh u Wisu uni u snem wei da kyrpaad leh wow pynsñiawthooh cha ki paidbah khamtam kiwa chah ktah ha ini i kær naar-chieh wow man ki kiwa yaichah.
Kam wow pynkynmoo heini wa i kær naar-chieh ha Hingaria da chah ktah i nadooh u Khonchonglad (November) 2019 heiwa ki paidbah da dawa ki ya i bai thaw wei da pynsangeh ki yei kreh ka NBCC neibhah ka sorkar da kular ko wow su ya i bai thaw wa da chim wow kær naar-chieh ha khappood tangwa hadooh ynne ka sngi ympu su ya kani ka poisa cha ki.
Ki paidbah da pynsñiaw ki leh yei pyrchah neibhah wa i rukom sorjamin ki bru ka sorkar toh i wym yoo tipsap wei toh na ini i daw wa da dawa ki wow yoh ya ka bai thaw katkam i hok yong ki.
Kiwa kitkaam ka JAC ha ka 15 tarik uni u bnai da lai e dorkhat biang ki ha u Deputy Commissioner ka East Jaiñtia Hills District, hajrong ini i kaam heiwa da paan ya i thup ki pyrtuid ki 63 ngut ki bru ka chnong Hingaria kiwa toh hok wow yoh ya kani ka bai thaw.
