Shillong: U Director of Health Services (MI), u Dr. Aman War ynne ka sngi da kyntu u ya kitu kiwa yaleh yaka Exam neibynta i kreh General Nursing and Midwifery (GNM) wow yaichah ki neibhah ym pu ye wow pynbna ya ka Result.
Katkam wa pyntip u DHS, ya katai ka Exam da dep wow pynman ha u Naisaphra ynnin u snem ya kawa da booh wow pynmih ya ka Result ha u Wisu (March) ha uni u snem, tangwa nei wan noh ka khlam COVID-19 da pynsangeh noh yei pynbna ya ka Result. Da pyntip u wa da em 133 ngut kiwa yaleh yaka Exam, wei ya katni, ka chnat i chait i khiah daw hap yang chwa ko chwa wow pynbna yaka Result hadooh wa da rap biang i long i man haka jylla na i chah ktah ha ka khlam.
U Dr. War da pyntip u wa i wym pu pynbna yaka Result toh wa ye wow wanrah yei tkhoh ha i krehkaam yong ka chnat, khamtam ha kini ka por wa ka jylla dang yakhun ko wow yada na i poor smat u khñiang COVID-19.
Da ong u leh wa katni ya kitai ki kaam dang pynnneh sah da kiwa kreh Contract wei lada pynbna ya ka Result daw hap wow pynpsiah da ki bru wa thymme iwa ye wow wanrah yei eh yaka jylla wow yakhun yaka khlam COVID-19, neibhah wa kitai kiwa kreh katni toh kiwa da dep yoh yei sikai wow pynbniah ha kani ka kaam.
U Director da ong u wa ini i pynslem yong ka chnat i chait i khiah wow pynbna ya katai ka Result ym toh wa leh mylliñ næ leh chiliang.
Hawa yatoh wa i thap chooh chooh ya ki wakreh hapoh ka chnat i chait i khiah da ki wakreh Contract wow yakhun yaka khlam COVID-19, u DHS da pyntip u wa hadooh kattæ, da em palat 200 ngut ki Nurse, hapoh 50 ngut ki Doctor wa palat 100 ngut ki Lab Technician, wei kini toh kiwa liwan na baar ka jylla wei kamjooh kiwa em ha ka jylla kiwa da dep puræ ha kani ka kaam.
