Jowai: Yow pynche wow pynsñiawthooh yaki paidbah hajrong i emkaam wow pynneh pynsah yaka spah ka rymaw namo ka Biological Diversity, neiliang ka chnat Division Forest Officer Jaiñtia Hills, Jowai Division, ynne ka sngi kawa man leh kam ka International Day for Biological Diversity da chim ko ya i bynta wow lehkmen ya kani ka sngi deiwa pynman yaka yalang ha Raliang Community Hall.
Hawa ong wa ka Biological Diversity mut wa kynthup ya waroh ki jait wa im haki soodong sookun ka bei rymaw nadooh ki khñiang, ki dieñ, ki seij, ki syntu, ki mrad wa kiwi kiwi da pyntip ka H.Lato MFS DFO Wildlife Division Jowai.
Da kyntu ko ya waroh wa emkaam wow pynneh pynsah ya waroh ki jait wa im wa em haka rymaw nadooh kiwa khian neidaw wa ki e myntoi ki ya u bru nadooh i baam, i dih, ki dawai dachin, ki jhoor ki jhep wa kiwi kiwi.
Kamwa ka phang yong uni u snem ong ko “Our Biodiversity Our Food Our Health” iwa mut wa i spah ka rymaw man ko i yoh baam wa pynchait pynkhiah ya i, kamtæ i pyn sñiawthooh paidbah da lai ko ha kani ka phang yow em kattæ ka su kylliang cha ka rymaw da i ki bru, neibhah ki baam wa e ka rymaw ya i, yoh i ya i doh i pran wa chait.
U kongsan ha kani ka sngi u C. Lyngdoh, Dolloi ka Elaka Raliang hawa e u yei klam da ong u wa waroh ini man i iwa sakhiat wei ym ye u len wa u Blai da kyrkhu kyrpang u ya i lyngba ka rymaw nalor wa i chong sah i ha ka, kawa pyndap leh ya waroh i emkaam yong i nadooh i baam, i dih wa kiwi tangwa boon na i ki bru dang kwah rhah ki wow yoh spah smat deiwa leh dusmon yaka rymaw khlem da pyrkhat chooh yaki pateiñ wa hadien.
Kamtæ kyntu u wow man ki bru wow thaw dei thaw ya iwa e ka rymaw khnang wow yoh myntoi ki pateiñ wow wan.
Ha kani ka sngi lehkmen ya ka International Day for Biological Diversity da wan chimbynta kamwa 27 tylli ki skur wa em chajan wei da saam leh yaki khusnam cha ki khynnah skur wa jop haka yakop thoh Essay wa ki yakop dro dur.
Kiwi de kiwa klam kynthup ya u Hamjhan Dkhar, General Secretary ka shnong Raliang, u Sanki Lamare, waheh chnong wa kiwi kiwi de.
Discussion about this post