U State President ka Bharatiya Janata Yuva Morcha (BJYM) namo ka chnat khynroo ka BJP uwa man leh u MDC ka JHADC, u Krison Langstang ynne da e khublei u ya u Montri Rangbahdooh ka ri, u Narendra Modi wa da sdang u ya ka AGNIPATH Scheme ha ka 14 tarik uni u bnai neibynta ki khynroo ka ri.
Da khana u wa kani ka Scheme toh neibynta kiwa em hapyrdi 17.5 snem hadooh 21 snem heiwa ye ki wow psiah kreh chipai la ha ka Army, Navy wa Air Force neibynta soo snem.
Chooh chooh da khana u wa ka tulop wow yoh ki u man ko ha u snem wa nyngkong T. 30,000 chi bnai, ha u snem wa ar T. 33,000 ha u snem wa le T. 36,500 wei ha u snem wa soo won u yoh ki T. 40,000 chi bnai.
Da pyntip u wa manda kut i chakri wa soo snem daw yoh ki T. 11.71 lak wei ye ki wow pteiñ wow kreh kam ki chipai lada kwah ki.
Neiliang u Krison da kyntu u ya ki khynroo ka jylla wow wan ki chaphrang wow thap ya kani ka Scheme khnang wow myntoi ki kamjooh leh wow e chakri ki ya ka ri.
