Khliehriat: Ka World Environment Day da lehwarom ya ka ynne ka sngi ha St. Peters Secondary School, Iongkaluh Village, East Jaiñtia Hills District hajrong ka phang “Beat Air Pollution” heiwa ya kani ka lehwarom da pynman da ka Divisional Soil and Water Conservation, EJH heiwa u montri ka chnat Disaster Management Minister u Kyrmen Shylla da man u kam u kongsan hei emlang u F.M. Dopth, DC ka District, u H. Passah, J.E (Water Resource), u Wanbha Buam naka Liquid and Solid Waste Management, u R. Nongtdu, SDO, PHE, Sister Ancy P.S., Headmistress, St Peter Secondary School Iongkaluh wa kiwi kiwi.
Ya kani ka yalang da pynlai da u F.M. Dopth, deiwa kyntu ya waroh wow pynneh pynsah ya ka rymaw heiwa ka Divisional Soil and Conservation da sdang ko wow thung dieñ ha kamwa 26 tylli ki chnong ka District.
Kam u kongsan ha kani ka sngi u Kyrmen Shylla da ong u wa ka NGT da chim ko ki rai kiwa yada ya ka rymaw wei i khang wow tih mooyong da ktah bha i ya i rukom im ki paidbah ka District. Da ong u leh wa ka NGT ym em hiwot u khang ko sbak ya u mooyong tangwa em ki kyndon wow pynlai ryntih ya i pynemkaam palat pood ki bru ya ki mar pohkhyndaw wei wow pynneh ya ka rymaw neibynta ka mynried kawa bha wa miat.
Da pynrap u leh deiwa ong wa i pam khiar ya ki dieñ neibynta i emkaam ki bru samen da booh i hei ma ya ka rymaw wa ya i mynsien bru waroh.
Chooh chooh da pyntip u leh ya ka “Mission Adopt a Tree” deiwa ong wa ka sorkar angnood ko wow thung hadooh 1.5 million ki dieñ nadooh ynne ka sngi deiwa kyntu ya ki paidbah wow chimbynta ki ha kani ka Mission dei thmu wow yada ya ka rymaw wa ki soodong sookun.
Neiliang u Kyrmen da saam u leh ya ki khusnaam kiwa da pynman hajrong ka phang “Beat Air Pollution” wei da pynbood won ya i thung dieñ ha pchem kani ka yung skur.
Kam wow pynkynmoo heini i thung dieñ daw pynman leh ha ki 31 tylli ki chnong wa 150 tylli ki skur hapoh ka District.
Discussion about this post