U MDC ka Mynsngat Khanduli Constituency, u Dawan Lyngdoh hadien wa yoo yei chah beh ki kari kit jhep ka Jowai Municipal Board ha ki paidbah wa chong chnong yong ka thaaiñ Mynkjai, Lamyrsiang wei katni sa ha ki paidbah ka Elaka Nartiang, da kyntu u ya ki wakreh ka Jowai Municipal Board (JMB) nadooh u Chairman wa kiwi kiwa ya krehlang wow lai katkam ki kyndon wa da mang chwa da ka sorkar khnang wow lait nei kulmar wei wow ye leh wow yada ya ka rymaw, ki thaw rep wei khamtam dooh yei chait i khiah ki paidbah wa boon wa lang.
Da ong u wa kamwa da yoo cha ki khubor ym em bood ka JMB ya ki kyndon kamwa toh u leh neitæ i daw kat cha wa lai noh jhep ka Jowai Municipal Board (JMB) da chah beh bait du hadien chi sngi ar sngi wa sdang noh jhep.
U MDC da pynbaad u leh wa i leh ka JMB hadooh katni ym em phær ko kamwa jooh ha Mynkjai, wei lada kamni du hadien kattu katni bnai daw man kam ha Mynkjai wa daw sma tung biang, neitæ i daw ki paidbah da pyrchah ki ya ini i leh ka JMB. Da ong u leh wa i rukom noh jhep da leh biang cha loom dep te thang tangwa heipor wa slap ym ye u thang wei ini i jhep daw sma-tung wei daw tooid ki cha ki pynthor kba.
Hajrong ini, da ong u wa kam uwa mihkhmat paidbah da kyntu ya ka JMB wow burom yei chait i khiah u paidbah wa ya ka rymaw wei toh u lai katkam i stat ka juk wa katni khnang wow lait nei sma-tung wei chah ktah i chait i khiah u paidbah wei wow yada ia ka soodong sookun.
Puræ leh: Pyrchah sa ka Elaka Nartiang yei thaw noh jhep ka Jowai Municipal Board
