Shillong: U Lamphang ka Yung Dorbar Chna-aiñ ka jylla, u Metbah Lyngdoh da kyntu joor u ya u Montri Rangbah ka Jylla, u Conrad K Sangma wow pynkrehkaam biang ya i khang sbak (Lockdown) ya ka jylla hadooh wa kut u bnai deiwa kdaw wa kiwa yoh ya u COVID-19 dang ku ki ha ka ri.
Ha ka chithi cha u Conrad ynnin ka miet, u Metbah da e u ya ki buit ki wow yarap ya ka Meghalaya wow lait na i poor uni u khñiang khlam wei iwi na kini toh wow pteiñ ya i khang sbak ya ka jylla hadooh wa kut uni u bnai.
Da pynchong yurim bha u wa katkam wa man emkaam wow khang chwa ya ki yaw kiwa heh ha ka jylla kam ha Shillong, Jowai, Tura wa kiwi kiwi.
Heijooh I por da kyntu u leh ya ka sorkar jylla wow khang sbak chwa chipor ya waroh ki yaw kiwa em ha ki khappood yong ki jylla kynthup wa kiwa em wa ka ri Bangladesh.
U Metbah da ong u leh wa waroh ki thaw psiah thaw mih yong ka jylla lada kiwa pynyabi wa kiwi ki jylla wa ka ri toh u khang chwa wei wow booh kyndon ya i lai i wan na kawi ka District cha kawi tawon.
Sa iwi i yumut toh wow chah u lai ki kari da ka Odd-Even System.
Da kyntu u leh ya u Montri Rangbah wow e buit ya ka sorkar India wow pynsangeh chwa chipor ya i lai i wan yong ki bor sonteri ka sorkar pyrdi cha ka jylla.
Da e buit u leh wow siat dawai ya waroh ki kari wa wan kit ya ki mar baam mardih ha ki thaw chwa wow psiah ki chapoh ka jylla.
Chooh chooh da kyntu u leh ya u Conrad wow thooh laad neibynta kammon wow kit ya ki mar rep ki paidbah ka jylla hajrong wa da em ki dkhot ka 1917 iTEAMS.
Khaddooh da kyntu u wow paitsiar joor hajrong i dor ki mar baam khamtam u khoo, u dai wa kiwi kiwi ha ka jylla.
Discussion about this post