Jowai: U montri wa pait ya ka chait ka khiah u AL Hek hadien wa tip u wa ki Doctor ka NEIGRIHMS u dam ki u krehkaam nadooh ynne ka 4 tarik kam ka dak wow dawa yei hok yong ki. U montri da sñiaw u wa ini i dam ki Doctor wow krehkaam daw ktah ko chiboon hadooh wow dooh yei mynsien bru iwa man iwa sñiawsih wei heijooh i por wa ye wow yait.
Neiliang ka sorkar jylla ka da chimkhia ko ya ini wa da chim rai ki Doctor wow dam u leh yei kaam yong ki wei neiliang u montri leh da rah u ya ini cha ki heh ka Ministry of Health and Family Welfare, ka sorkar India yow pynbait ya ini i kaam. Da phah leh ya ki chithi neiliang u montri cha u Director ka NEIGRIHMS kamjooh cha ki Doctor kiwa pynman ya ka yakhih yow poi cha ka ya sñiawthooh lang wei wow dam leh ya kani rai kawa daw ktah ya kiwa kjut kiwa chitom.
Heijooh i por u Hek da pyntip u wa kattæ i krehkaam kani ka thaw sumaar lai bait hi i khlem em i thut hadien wa da kyrpaad u wei da kyntu u leh ya ki Doctor wow pyndam ya ka yakhih yong ki.
Da kular u leh wa ya i dawa yong ki Doctor daw pynbait ya ki wut wut wei ha kini ki bnai wa da dep da yachem u wa u J.P. Nadda Union Minister deilang wa u montri rangbah ka Meghalaya ha Delhi wei neiliang u Union Health Minister da kular u wow chimkhia ya ki kaam wa yatoh waka NEIGRIHMS.
U Hek da pyntip u leh wa da yachem u wa ki Doctor ha kamra krehkaam yong oo wei da rai ki wow pyndam chwa ya ka yakhih.
Discussion about this post