Hadien wa ynnin ka 20 tarik da man ko ka sngi wa sahkynmoo ha ka Election ka jylla dei wym jooh em u kyrtong yong kawon kawon ka Party u chah beh namo u chah pyndam u wow pynman ya ka yalang yalap Election wot hadien wa da yohbor na ki sahep ka Election Commission.
Wei yeini da jia ya u Nehemayah Tyngkan uwa da chah khang wow pynman ya ka yalang yalap Election wei hawa yoh u yaklam wa uni u kyrtong ka Congress na Mowkaiaw Constituency da ong u wa da yohbor u na ki Waheh Chnong wa ka Returning Officer heiwa u pynman ya ka yalang ha Sahsniang heipor 8:00 hadooh 10:00 waje i step.
Da ong u wa manda poi hei thaw, ki waheh ka chnong da khang ki ya oo neibhah wa daw mih i awri awra hanla oo wan u cha kani ka chnong du wa ki kattu katni kiwa kyrchaan yong oo wei wan u du wow klam ya kiwa wan yaaw ha kani ka chnong neibhah wa man ko ka sngi yaaw wa khaddooh chwa ka sngi thap Vote.
Hajrong ini da kyrpaad u ya kiwa kyrchaan yong oo wow man kiwa jai jai wei ymtoh u man ki kiwa chongchit.
Heijooh i por kam u tre chnong ka Iooksi, da kyntu u ya ki waheh ka Dorbar Chnong Iooksi wow pdiang ya waroh ki kyrtong wow pynsñiaw ki ya ka thong yong ki wei ym toh wow su kylliang yeiwa da jia ya oo ha Sahsniang.
U Nehemayah da kyrpaad u leh ya waroh wow kyrchaan ya oo kam uwa duna hei yoh i laa wei u khonswet.
