U MLA ka Congress na Mawlai, u Process T Sawkmie da pynsñiaw u yei mynsien wa khia hajrong i wanrah ka sorkar Assam ya i thmu wow pynman aiñ yada masi namo ka Assam Cattle Preservation Bill 2021, neibhah wa daw ktah ko chiboon ya ka jylla Meghalaya nei chah khang i chalan masi lyngba ka Assam.
Da ong u wa hadien wa man aiñ kani ka Bill, ki masi kiwa lai lyngba ka Assam wow chalan cha ka jylla kiwa chah ktah toh ki bru kiwa kreh ha i kaam khayi wei dai doh masi, neibhah wa lada lai lyngba na Assam hap yoh da kawi ka Permit deiwa pynrap leh wa ka Assam da leh pyrchah ko ya ki kyndon ka sorkar India wa ym toh wow pynthut ya ki kari kit mar ha u sarokbah.
Heijooh i por da ong u wa lada ki bru ka jylla chem chitom ki na kani ka aiñ ka sorkar Assam, boi daw poi i por wa ki bru ka Meghalaya daw dawa ki wa ki truck wa kit tiar cha Assam wa daw hap leh ki da kawi ka Permit lada lai ki lyngba ka Meghalaya wei ini daw wanrah i yei yaphær yumut hapyrdi kini ki ar jylla.
Chooh chooh da ong u wa i wanrah ya kani ka aiñ pynyoo i wa em iyi iyi cha lyndet neibhah wa daw em ki kyndon wa boon wow pynchitom ya ki bru.
U Process da kyntu u leh ya ka sorkar Meghalaya Democratic Alliance kawa kyrchaan ya ka sorkar NDA ha Delhi wow pynsñiaw hajrong kani ka phang cha u montri rangbahdooh ka ri neibhah kani ka Bill daw ktah ko ya i khih i kreh wa i rukom baam ki paidbah ka jylla.
Hawa kylli, u Process uwa man leh u Chief Whip ka Congress ha Assembly da ong u wa neiliang ki MLA ka Congress ha Assam ye ki wow em da iwi i rukom pyrkhat wei ymtip lada pyrchah næ kyrchaan ki ya kani ka Bill.
