Kyntu u S. Dhar wow ya tipmit para kur iwa man iwa emkaam bha, hawa klam ha ka Dorbar Kur Dhar

Jowai: U montri ka sorkar jylla uwa pait ya ka chnat Commerce & Industries Department, Community & Rural Development Department wa kiwi de u Sniawbhalang Dhar, hawa klam haka Dorbar Kur Dhar kawa pynman ynne ka sngi ka 14 tarik, kam u kongsan da ong u wa i ya tipmit wa i yachem para kur para jait man ko kawa emkaam bha ha ki liang waphær waphær yong imlang sahlang wa ha kiwi de ki bynta. Da ong u leh wa boonsien hi kam kiwa mihkhmat ym ye de wow ya tipmit pyn ya chi kur neidaw wa boon ki kur wei kamjooh i boon kaam, kamtæ da kyntu u yaki para kur wa toh wow ya tipmit ki para ki.

Neiliang u Dhar da kular u leh wa daw e u yaka kyrchaan wow yarap hawa yatoh wa ki kaam ki jaam yong ka kur Dhar, da kyntu u leh ya kiwa kitkaam yong ka kur wa ki toh u pyntip næ pynsñiaw ya kiwon ki eh yong ka kur, wei daw yarap lang u katwa ye i bor yong oo, neibynta i bha i miat yong ka kur Dhar.

Ya ka yalang uni u snem da pynman ha Jalapang Community Hall Wahiajer, West Jaiñtia Hills District, kawa da pynlai da u President u R. Dhar, da yoh ya ka ngooh Blai na u Wansalan E. Dhar, ya ki ktien pdiang na u S. Dhar, Chairman Kur Dhar Wahiajer. Kiwi de kiwa e yei klam kynthup ki ya u Fabiola Rupa Dhar neiliang ki khynroo, ka Leslymon Dhar na ki manbei, u Adviser ka LLKD Jaiñtia u D.B. Dhar, u H. Dhar u Dolloi ka Elaka Nartiang, da pynsñiaw leh yaka Report na u General Secretary u D.S. Dhar, ka Nila Dhar ka Treasurer, President Kur Dhar Shillong u Stevenson Nongdhar wa kiwi.

Kamwa jooh leh man u snem, ka Kur Dhar kam chibynta wow pynchlur wei wow e mynsien ya ki khynroo khyllod wa lai puræ, da e sñiawbha da ki khusnam wa kyrpang deilang wa ki Certificate cha kiwa da leh bha ha ki Exam næ kiwa poi chakhmat ha ki kyrdan waphær waphær ha ki Exam wa dang dep.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Yow pynbha chooh chooh ya ki rukom krehkaam yong ka Kur, da ya chimbynta lang hei wow ya phyllu yumut neibynta ka bha ka miat yong ka Kur hi waroh kawi. Ynne ka sngi khnang wow pynkhlan chooh chooh ya ka rukom krehkaam yong ka Kur, da yoh wow pynskem ya ki le tylli ki Zone krehkaam ka Kur Dhar ha ri-loom Jaiñtia kiwa kynthup ya ka Zone I, II, III katwa ya ka Zone IV won daw pynskem hadien. Kini ki Zone toh ki wow pait ha ki Elaka waphær waphær wa em ki ha ri-loom Jaiñtia.

Da pynphooh pynphieñ ya kane ka sngi da ki Chaad Pliang, ki rwai wa ki chaad kiwa da chimbynta da ki khon khynroo khyllood ka kur na ki chnong waphær waphær.