U Vice President ka ri, u M Venkaiah Naidu ynne da kyntu u wow esikai da i ktien yong-i-dæ (Mother Tongue) hawa e sikai ha ki skur Primary hadooh Class 5.
Da ong u wa i esikai dei ktien para iwa ymtoh dei ktien wa klam ha yung daw chem chitom bha ki khynnah u sñiawthooh ha skur ha ki Class khian.
U Naidu da ong u wa katkam wa chem kiwa tih bniah (Studies), da chem wa i esikai da i ktien wa klam ha yung daw pynchlur i ya ki khynnah wei daw pynskem mynsien i leh ya ki khynnah wei daw wailaad leh yei chemsap yong ki.
Heiyatoh wa ka National Education Policy da kyntu u leh wow pynkrehkaam pura ya ka.
Ya ini u Naidu da ong u heipor wa sdang ka Webinar wa pynman da ka Ministry of Education and Ministry of Culture, heiwa da kdaw u ya ki bynta wow pynemkaam ya i ktien yong-i-dæ hawa esikai, ha i synchaar, ki yung kasari wa i e sikai deiwa kyntu leh wow pynchlur wow pynemkaam ha ki puræ wa heh kyrdan (Higher and technical education) kamjooh wow klam da i ktien yong-i-dæ ha yung.
U Vice President uwa da bna hei wow pynchlur u pynemkaam yei ktien yong-idæ da ong u wa i boon ki ktien ki thylliej toh ki chrot wa mih kiwa boon ki jait stat hapoh ka ri, ki ktien ym toh du wow sñiawthooh uwi ya uwi, pynwan dur ki leh ya ki jar jiar ki dustur riti.
