U President ka Meghalaya Pradesh Congress Committee, u Vincent Pala da ong u wa kam ka Party yieñ skem ko ha ka yurim wym leh chiliang wei wow kduplang ya waroh ki niam katkam wa da thoh da taar hapoh ka riti synchaar ka ri wei kani man ko kawi na ki paya wa da tei ya ka synchaar paidbah hapoh ka ri yow e yei man salonsar, i laitlooid wei u burom ya waroh ki jait niam wa em ha India hanla man ki Christan, ki Hindu, Islam, Niamtre, Niam Khasi wa kiwi de yow im dei suk.
Kamtæ u Vincent da ong u wa iwa klam wa iwa mut wow leh deiwa yachah chiliang ya kawi ka niam khlem da pyrkhat de ya kiwi toh iwa man pyrchah yeiwa da em hapoh ka riti synchaar kamjooh kawa phiah ya ka imlang sahlang.
Da ong u leh wa ka Congress toh kawa ngait ya ka yurim wa ong Sarva Dharma Samabhava iwa mut wow burom salonsar ya waroh ki niam, kamtæ da kyntu u ya waroh kiwa yahkhmat khlem da pyrkhat ki ha kawon ka Party wa em ki wow klam wei wow leh deiwa pyrkhat bha.
Chooh chooh da ong u wa i bor ka Meghalaya toh yeiwa em ko boon ki jaitbru kiwa boon jait, kiwa boon ki niam wei kiwa yoh ki jooh ki laad hawa leh ki ya iwon iwon, hajrong ini da khut ya ka sorkar wow wanrah yei yatylli wei burom markylliang ymtoh deiwa pynemkaam ki kyntien næ leh ki kaam wa pynchit paidbah du wow yoh myntoi chibet chipor wei wow yait leh u leh ya kam kini.
Da khut u leh ya kiwa chong chnong ka Meghalaya wow man kiwa yatylli wei wow burom yeiwa ngait yong kiwi yow lai ka jylla deilang ka ri chakhmat.
Discussion about this post