Jowai: Ynne ka sngi u MLA ka Jowai, u Wailadmiki Shylla da thoh u cha u montri rangbah ka jylla, u Conrad Sangma wow kyntu ya oo wow pynlait noh ya ka poisa bai soor Mask ki Self Help Group (SHG) wa ki bru samen hadien wa poi ka khlam u COVID-19 chapoh ka jylla.
Kam wow pynkynmoo heini hadien wa sdang kani ka khlam neiliang ka chnat District Commerce and Industries Center, West Jaiñtia Hills da phah (Order) ko ya ki SHG wa ki bru samen wow soor ya ki Mask khnang wow ye u saam paidbah wei wow pynemkaam ya ki.
I bai soor ya kini ki mask man i T. 10 kawi wei hadooh ynne ka sngi kiwa boon ki SHG wa ki bru samen ympu em u su ya kani ka bai soor.
Heiyatoh wa ini, neiliang u Conrad da kular u wow chimkhia yeini wei wow pyntikna wow pynlait noh ya kani ka poisa.
