Jowai: Ka seiñ All Hynniewtrep People United Front (AHPUF) e ko i kyrchaan wa pura hajrong i ujor ka Khun Hynñiewtrep National Awakening Movement (KHNAM) Youth Wing pyrchah ya u Vinu Sishupal Rampal ha Khasi Hills Autonomous District Council (KHADC) Shillong haka 22 tarik uni u bnai heiyatoh wa i yoh Schedule Tribe Certificate u.
Ka seiñ AHPUF da ong ko wa hei sakhiat yaka Schedule Tribe Certificate toh u e du yaki watoh naka snam Khasi ym toh ya kiwi. Kamtæ da beiñ joor ko yaka KHADC wa yaka DC Office Shillong kiwa da e Certificate cha uni u baar jylla khlem da thooh bniah chwa yei tre wa toh hi mo uwa da kha naka doh ka snam Khasi paka.
Da ong leh wa i e Certificate ya kam kini ki baar jylla toh iwa nang pynboon wa choon yaka ri wa ka jaitbru, i kjut wow nang tyndung tynrah yei manbru u paaid Ynñiawtrep. Yei mantre ri toh du u symbe wa sai na i doh i snam yong ka hi ym toh uwa wan hiar wan haap kat nawa em hi-eh.
Ka seiñ da beiñ joor ko ya waroh kitu kiwa ya embynta hei wow pynkylla snam Khasi yabor yaki baar jylla, kini toh kitæ kiwa chet kylla yaka jaitbru Khasi wei ymtoh u pdiang yaki.
Kamtæ ka seiñ da dawa ko wow pyndooh noh syndon ya kani ka Schedule Tribe Certificate yong uni u bru, wei ka Khasi Hills Autonomous District Council leh toh u booddien wei bichaar hok ko ya kani ka kaam.
