Kyrchaan ka AJYWO ya ka JHADC wow chna ya ka Bill chongkha

Jowai: Ka AJYWO Central Body, da pynsñiaw ko yei sñiawkmen wa ka JHADC hapoh i yahkhmat u CEM yong ka u Madonbai Rymbai da chim ki ya ka rai wow pynkhreh ya Jaiñtia Hills Autonomous District (Jaintia Social Custom of Line-age) Bill-2018 wei daw wanrah ya ka ha ka Dorbar Tlang ka Council.

“I kam ki bru khian paaid khamtam hapoh ri-loom Jaiñtia emkaam bha i ya kani ka aiñ wow yada ya ka jaitbru kamjooh i hok yong ki katkam wa da pynkup hapoh ka 6^thSchedule ka riti synchaar ka ri,” da ong u M H Dkhar, u President ka seiñ.

Chooh chooh da ong u wa da ki phaw snem kiwa yahkhmat ka JHADC da mylliñ ki wow leh ya ini wei lada leh ya ini da slem ka JHADC ym em ko ha i thaw wa em ko katni khlem yada yei hok ka jaitbru wei ym kwah i wa ka jylla yong i u man ko kamwa jia ha jylla Tripura heiwa da man khian paaid ki tre jylla.

Ka seiñ da ong ko wa ka JHADC wa ymtoh de wow pynslem ko wow leh ya kani ka kaam wei toh u man ka rai wa skem yow kitkhlieh wow yada ya ki manyung mansem wei emkaam leh ya ka aiñ wa paka kawa em lamieñ wei emkaam leh wow yohlaad ki paidbah wow e yumut ya kani ka Bill yow man ko kawa khlan.