Ka seiñ FKJGP East Jaintia Hills District dap ko dei sñiawkhia wa joor hajrong i wym bna ka Dalmia Cement ya iwa iyi ka Dorbar Chnong Thangskai da maham da khang ko wym toh u noh taroi ya ki Plastic, ki jhep iwa da man iwa maa wa khroo ya ka rymaw wei khamtam ya ki bru wa riñ mynsien wa pynhiar mynsien hadooh wa ka chnong da hap ko wow lai khang yei thaw noh jhep kani ka karkhana.
Ka seiñ da ong ko wa ki bor pynlai ka Dalmia Cement da yoohbeiñ ki ya ka chnong Thangskai wa ka jaitbru yong i deiwa leh katwa ngait wow pynsih ya ka rymaw neibhah kini toh kiwa daw yut noh mar ya dep i kaam yong ki wei daw ieh ki ya kiwa chong chnong hei maa khamtam ya ka pateiñ wa wan.
Ka FKJGP da kyrchaan pura ko ya ka Dorbar Chnong Thangskai wow leh deiwa eh ya ki bor pynlai ka Dalmia Cement wei ka seiñ da klam che ko wa lada ki bor chnong emkaam yarap ki, ka seiñ man ko kawa smat wow mih chakhmat wow kyrchan doh wa mynsien ya ka chnong Thangskai.
Ka seiñ da beiñ joor ko leh ya u Deputy Commissioner, East Jaiñtia Hills District Khliehriat wym mano u yei ujor ka Dorbar Chnong Thangskai wei nei wym chimkhia u DC da pynman ya ka Dalmia Cement wow leh khiar ya ka Dorbar Chnong Thangskai.
Puræ leh: Lai khang ka chnong Thangskai yei thaw pynlang jhep ka karkhana Dalmia
