Ka seiñ HYC Narpuh Circle haka kyrwoh na u Publicity Secretary ka seiñ u Pyndap Syiemlieh, ynne ka sngi da pyntip u wa ka seiñ kyrchaan lang ko ya ka seiñ EJNC wow mih chakhmat yow lai paidbah lane wow chongkyllaiñ mynngor hakhmat ka yung krehkaam u DC ka East Jaiñtia Hills haka 02-07-2021 kam chibynta wow pyrchah joor yei yoh Environmental Clearance ka Star Cement wa da e da ka sorkar pyrdi deiwa leh sop sop lang wa ka sorkar jylla.
Ka seiñ da ong ko wa da yieñ pyrchah bait ko nadooh wa sdang wei hadooh wakut khlem da kynrandien lada man katwa man leh.
Ka seiñ da ong ko wa ka pynsñiaw ko yei sñiawkhia wa joor hajrong wa kam ka Meghalaya State Pollution Control Board (MSPCB) heithaw wow yada ya ki khloo ki kjam, ya ka bei rymaw tangwa da emlang ko waka karkhana wow e bor ya ka Star Cement.
Kamtæ ka seiñ da ong ko wa ka sorkar toh u kynmoo ko wa ymtoh wow yooh beiñ ya i hok longbru manbru wa i sur paidbah lane kiwa chong chnong ka thaaiñ wow pynkreh yabor deiwa e bor ya ka Star Cement hapyrdi wa dang em i pyrchah yong kiwa boon wa lang.
Khaddooh ka seiñ da ong ko wa lada ka sorkar ym ap wei pyndooh noh chisyndon wei pynsangeh yei e bor ya ka Star Cement wow leh bor ko, neiliang ka HYC Narpuh Circle da klam che ko wow leh bor wei lada jia iyi, i bahkhlieh u lai i cha ka sorkar jylla.
