Kyrchaan ka KSU Narpuh Circle wow e kti ya ka Wah Lukha cha ka seiñ ki 6 chnong

Jowai: Ka Khasi Students’ Union (KSU) Narpuh Circle da e ko i kyrchaan ya i dawa ka 6 Shnong Wah Lukha Association na ka JHADC wow e kti noh ya ka wah Lukha wow pait wow pynlai da katai ka Association neibynta i bha i biang, i myntoi wa i yohnong ki paidbah. Kamwa man katni ka Council ka dai lilam ko ya ka wah Lukha man u snem deiwa khut Tender ya kiwon kiwon kiwa kwah wow chim wai, tangwa ini i dai lilam ya ka wah Lukha da pynyoh nong ko du ya uwa thied wei pyndooh nong won ko ya kiwa boon wa lang.

Ka seiñ da ong ko wa hawa pait cha ki snem wa da lai wei hadooh katni, ka District Council ym jooh em ko i kitkhlieh heiyatoh wa i sih ka wah Lukha wei ka Council hi ym jooh tuklar mynnu mynnu leh ya i daw wa ka wah Lukha kylla rong suiñ bneiñ ko wa yap roi ki dakha. Kani hi pynyoo wa ka Council tip ko du wow dai, tangwa wow sumaar ym em por ko. Kamtæ ka Council toh u sangeh noh ko wow khut Tender wow lilam ya kani ka wah wei toh u e kti ha u paidbah lyngba katai ka Association wow pait wow sumaar yaka wah.

Chooh chooh ka seiñ da ong ko wa ka JHADC ym tip ko wa hawa dai lilam ya ka wah Lukha cha ki bru samen, wanrah ko yei dooh jait ya ki symbe dakha, neibhah wa uwa thied ym bna u iyi iyi leh ya ki kyndon wa da booh da ka Council. Wei du wow yohnong wei myntoi samen uwa thied, ym salia u wow tong naphang nadooh kiwa khian wa kiwa heh ki doh um iwa tygkheiñ syndon ya ki kyndon aiñ wa da booh. Ki parom kiwa khana da ki tymmen kiwa jooh khwe dakha da khana ki wa chisien wa uwa thied wai ya ka wah Lukha wieh jaar u wow tong dakha, kiwa khwe ym yoh myntoi de ki neidaw wa ym dait de ki dakha neidaw wa sñiawthooh ki yei sma jaar.

Kamtæ ka seiñ da ong ko wa i dai lilam wanrah ko yei dooh nong wa khroo ya ki paidbah wa im wa kamai ha kani ka wah. Kitai ki 6 chnong wa kynthup ya ka chnong Sakhri, Umtalen, Sonapyrdi, Shymplong, Borsara wa Kuliang kiwa em hapoh ka satri ka 6 Shnong Wah Lukha Association kiwa kwah wow pynman ya ka wah Lukha kam kawi na ki thaw wa pawnaam wa yoosuk wow taan ya kiwa wan uiñke suwari ka pyrthai. Ini i thmu man ko neibynta wow pynyoh kaam yoh jaam ya ki tre chnong. Deiwa ye ki u pynneh pynsah ya ki dakha wa boonjait daw wanrah ko yei yoh khih ki chnong kiwa em harood kani ka wah. Ka seiñ sñiaw yahap ko yei dawa wa em yurim yong katai ka Association wei e ko yei kyrchaan yei dawa.