Kyrchaan ka KSU Narpuh Circle yei dawa C&RD Block ka NBAJAC ha Lumshnong

Jowai: Ka Khasi Students’ Union (KSU) Narpuh Circle da pynsñiaw ko yei kyrchaan wa pura ya i dawa ka Narpuh Border Area Joint Action Committee (NBAJAC) na u montri wa pait ya ka chnat Community & Rural Development u Sniawbhalang Dhar wow pynyoh noh ya ka C&RD Block wa thymme katkam i angnood ki paidbah ka thaaiñ Narpuh da slem.

Ka seiñ da ong em ko em ko ha chrooh ka NBAJAC nadooh wa sdang i dawa wow kyrriah ya ka yung krehkaam ka C&RD Block na Wapung cha Narpuh kawa toh u em ha Lumshnong, EJH. Ka seiñ ka embynta ko leh wa kani ka Committee wow lai yachem ya u montri rangbah ka jylla u Conrad K Sangma ha ka 13-09-2018 wei da booh yaka dawa wow pynneh ya ka C&RD ha Lumshnong. Tangwa ha kani ka yachem wa u Conrad ym em poi ko cheiwon cheiwon neidaw wa duna poisa ka sorkar.

Ka seiñ da pyntip ko leh wa u montri rangbah hawa yaklam wa oo da ong u wa dang emkaam poisa sa T. 100 klur wow su yaka tulop kiwa sikai SSA. Tangwa da ong u leh wa neidaw wa dang chimkti u kam u montri rangbah wa thymme da paan por u wow pyrkhat ya kani ka kaam.

Kamtæ ka seiñ ha kani ka kynti deilang waka NBAJAC da pynkynmoo ko yaka sorkar wow pynman kaam ya i dawa yong u paidbah ka thaaiñ, wei ka seiñ ym chong kli kti wei u booddien ko ya kani ka kaam hadooh wa kut.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka seiñ da ong ko leh wa ka thaaiñ Narpuh da em hok ko wow yoh smat ya kani ka yung krehkaam wa emkaam tam neidaw wa da ku leh i boon bru, wei ki chnong ki thaw leh dang heh ki katwa dang lai ki por.

Ka seiñ da sñiaw ko wa ka thaaiñ Narpuh ym toh de u neh bait ko kamjooh khlem kiwon kiwon ki kaam pynroi naka sorkar, wei emkaam i kylla, ka roi ka paar wa ka yoh ka kot.

Da kyntu leh ya u montri ka C&RD Block wow ap yeini i dawa ki paidbah iwa nadooh wa yachem wa u montri rangbah kawa da jaan dap chisnem ym man kaam ko, kamjooh leh ya u MLA yong ka Sutnga Saipung Constituency u S. Pale wow yarap klam waka sorkar heiyatoh wa ini i dawa.

Ini toh katkam kyrwoh na u Deibormi Dkhar, General Secretary, KSU Narpuh Circle.

Also Read: Dawa ka NBAJAC na u Sniawbhalang yow booh C&RD Block ha Lumshnong