Ka KSU-Narpuh Circle lyngba u Vice President, u Phanuel Tongper da e ko i kyrchaan wa pura ya ka Dorbar Chnong Umkiang hajrong i dawa pynku kyrdan (Upgrade) ya ka PHC kawa em ha Umkiang cha ka CHC neidaw wa datoh sakhiat i por u Upgrade noh.
Kiwa chong chnong kiwa ckheh wa chaniah ha kani ka Hospital da em ki hadooh 15,000 ngut ha ki 16 tylli ki chnong wei kini ki chnong kynthup ki leh nadooh ka chnong Huroi, Lejri, Lailong, Borsara kiwa em cha khappood Bangladesh wei da chaniah bait ki ha ka PHC Umkiang. Kani ka PHC man ko leh kawa em khaddooh ha khappood waka Assam.
Ka seiñ da ong ko boonsien leh ki paidbah kiwa kjut hap ki u chah yei kjut yei chitom lane wow pynlut poisa khamtam kiwa dooh kiwa da hap lai phah sumaar chadooh cha Assam, du neibynta wym biang ki dawai dapon hadooh ki tiar wow Test kjut. Hadooh u Doctor MBBS leh ym em waroh chi kattu ki por, ki yung leh toh hi kamwa da kdaw ka Dorbar Chnong kiwa da jæd, ki thaw thiah kiwa kjut, ki tin yung kiwa da piah, heipor liur da hap u diang da ki dabor, da ki borti cha waroh ki kamra thiah kjut, kamra Doctor wot ha kamra booh dawai dachin neidaw wa joo ka umslap wa piah ki tin yung.
Ka KSU-Narpuh Circle leh da jooh lai pait ko ya kani ka PHC kawa man leh ka PHC kawa da rim tam, kawa dawa tam u pynku noh cha ka CHC neibhah heini ka Police Patrolling Post leh em ko ha Umkiang wei chiboon ki jia tyrrah kari wa mynsoo da hap wanrah ha kani ka thaw yow e sumaar jhan.
Katwa kamtæ ka KSU-Narpuh Circle da e ko yei kyrchaan wa pura ya ka Dorbar Chnong Umkiang hajrong i dawa u Upgrade na ka PHC cha ka CHC.
Puræ leh: Dawa ka Dorbar Chnong Umkiang na u James wow pynku kyrdan noh ya ka PHC cha ka CHC
