Khliehriat: Ka Southern Border Youth Welfare Association (SBYWA), Elaka:Rymbai & Lakadong, East Jaiñtia Hills lyngba kiwa yahkhmat yong ka wa kynthup ya u Skhembor Shadap, President wa u Namphrangmi L Talang, General Secretary da pynsñiaw ko yei e kyrchaan yei pyrchah wa joor ki seiñ khayi mooyong wa na East Jaiñtia Hills kawa kynthup nadooh ka seiñ Jaiñtia Coal Miner and Dealer Association, East Jaiñtia Coal Supplier Association, Jaiñtia Amalgamated Redressal Forum wa kamjooh ya ki seiñbhalang waphær waphær kam ka Synjuk Waheh Shnong East Jaiñtia, JSM, JNC, HANM wa kiwi de kiwa pyrchah yei rai ka sorkar wow chah u wanrah ya u mooyong na Assam cha ki Cement Factory wa em ha East Jaiñtia neidaw ha kam kini ki por wa ka khlam COVID-19 dang joor bha ko ha jylla Assam kawa man leh ka Red Zone.
U S. Shadap, President ka SBYWA da pynsñiaw u yei yoobeiñ ka sorkar ya ka District ha kam ini i por khlam heiwa ki paidbah wa kiwa synchaar chnong da yakrehlang ki chirup chirup wow yakhun pyrchah ya u COVID-19 deiwa phah chong yung ya kiwa chong chnong wei lada kamni ka sorkar e laad ko wow pynpoi ya u mooyong cha District kawa man ka Green Zone, ini pynyoo ko kam wa wanrah pathan ya u Coronavirus cha ki nong East Jaiñtia kawa booh hei sier ya ki paidbah, neitæ i daw ym em yumut kani ka pakhang chnong yong ka sorkar ha kini ki por wa da dep.
Neitæ ka seiñ booh ko ya u dak kylli, “Wei leh ka sorkar ym chah ko wow challan ya u mooyong hapoh kani ka District kam wa da dep pynbna da ka Panel Committee yong ka National Green Tribunal deilang wa ka sorkar jylla kamwa 2 lak ton, te wei leh won ka sorkar ym e laad ko ya ki paidbah ka jylla Meghalaya wow pynpoi ya u mooyong cha ki Company lada emkam mooyong ki.”
Chooh chooh u S. Shadap da pynsñiaw u yei leh chilliang ka sorkar jylla hapoh i synchaar ka sorkar MDA heiwa ki paidbah hapoh ka District da chitom ki u lai u wan tang na kawi ka chnong cha kawi chnong ha kini ki por wa da dep lane tang ka Inter-District hapoh Jaiñtia leh ym chah ka sorkar ya ki paidbah wow lai u wan te wei leh ya u mooyong da chah ko wow wanrah cha Cement Plant nadooh Assam tæ hawa kamni pynyoo ka sorkar em ko iyi iyi cha lyndet.
Hawa pynkut ya ka kyrwoh ka seiñ da ong che ko la jia wa wan kani ka kjut COVID-19 ha East Jaiñtia Hills District, ka sorkar toh u chim ko yei kitkhlieh nalor wa kani ka District ym biang ko kitæ ki laad yada kiwa paka, wot ya kitu ki khynnah puræ kiwa dang wan poi yung leh, ka sorkar ym em ye ko pynbiang yei thaw wa kyrpang wow leh Quarantine ya ki, tæ lada kamni lada jia wa yoh ka kani ka kjut cheiwon ki paidbah ka East Jaiñtia wow lai ki, da kylli biang ka seiñ SBYWA.
Discussion about this post