Shillong: Ka Synjuk ki Nongsynshar Shnong ka Bri Hynniewtrep (SNSBH) da e ko yei kyrchaan lada waroh 60 ngut ki MLA em ki i kitkhlieh deiwa lai cha Delhi wow wanrah yei dawa pynkrehkaam ya ka Inner Line Permit ha kani ka jylla, khlem pyrkhat ya ka Party wa em ki tangwa emkaam wow booh yei yatylli khnang wa i dawa u man i iwa chongkhia.
Hadien ki heh yong ki seiñ saiñpyrthai wa kynthup ya kiwa em ha ka sorkar wa yahkhmat u Conrad K Sangma na ka NPP wa ka liang pyrchah (INC) da lai yachem ki ya u Lat, Satya Pal Malik wow phah chimkhia hajrong ka aiñ yada na ki baar jylla, kam ka ILP wa ka MRSSA, ynne ka sngi neiliang ka Synjuk ki Nongsynshar Shnong ka Bri Hynniewtrep (SNSBH) leh da lai yachem ko ya u Lat ka jylla wow yaklam hahrong ini i jooh.
U Secretary ka SNSBH, u RL Blah da pyntip u wa i yachem toh wow yaklam bait hajrong i man i long ka jylla, heiwa ka Synjuk da pynsñiaw ko leh yei sñiawkhia hakhmat u Lat nei wympu ye u pynkrehkaam ya ka ILP kawa man ka phang wa emkaam ha ka jylla.
Neiliang u Lat da pynsñiaw u yeijooh haphrang ka Synjuk wow chimkhia yeini deiwa lai yaklam yeini ha Delhi wow khana yei angnood ki paidbah ka jylla.
U Blah da ong u wa u Lat da ektien u wow pyrchang u katwa ye wow yaklam yeini wow pynmankaam yeiwa angnood ki paidbah ka jylla, neibynta wow pynneh yei suk i saiñ.
Da ong u leh wa ka Synjuk daw yachem biang ko wa u Lat hadien wa wan u na Delhi wow booddien yeini wow tip yeiwa mut wa thmu ka sorkar pyrdi.
