Heiyatoh wa i jia wa i chah pynbaad wa chah dat wei chah khi khulooiñ kawi ka bru wa tip pyrtuid kam ka Kashmir haka chnong Bakur, West Jaiñtia Hills heiwa da pynbaad wa u waheh chnong, u Secretary chnong waka seiñ kynthai da thombor ki yaka Kashmir wei da chah ujor leh kiwa yahkhmat chnong.
Ka Synjuk Rangbah Shnong War Jaintia Amlarem Sub-Division, da kyrchaan ki ya iyi wa da pynsñiaw paidbah daka Dorbar Chnong Bakur lyngba ki Social Media, wei ha i jooh i por ka Synjuk da beiñ joor ko ya kiwa chim kabu wow pyndooh burom ya kiwa yahkhmat chnong wa yaka Dorbar Chnong khlem ki yurim wa biang.
Ka Synjuk da ong ko wa kam ini i chim kabu da ktah ko leh yei burom yong ki Dorbar Chnong. Ka Synjuk da kylli ko yaki bor wa toh u pait wei wow yada ya i kur i jait yong ki khon Ynñiawtrep Ynñiawskum, wow leh kammon ya kitu ki bru kiwa chim tooh ya i jait i kur Ynñiawtrep Ynñiawskum. Da ong wa ka Kashmir toh kawa chim hi-eh yei jait kur Dkhar yow yoh man khon Ynñiawtrep.
Neini i daw, ka Synjuk da kyrpaad ko yaki bor wa toh u pait yaka aiñ wow e yaka bichaar wa hok lym kamtæ ki Dorbar Chnong u man ki du kam ki sohpdung wow chah pynbaad.
Ka kyrwoh na u H.B. Rymbui, Vice President ka Synjuk Rangbah Shnong War Jaiñtia, Amlarem wa na u Siangmin G Lacuna, Secretary ka Synjuk Rangbah Shnong Synjuk Rangbah Shnong War Jaintia, Amlarem.
