Ka TUR da pynsñiaw ko yei kyrchaan wei dawa lang ko ryngkat wa kiwa sikai wa ka sorkar toh u e tulop ko da kawa ye u kyrchaan pura yow im yow pyndap pynbiang ha yung ha sem iwa mut ka Living Wage.
Da ong wa iwa khyrngiat toh kiwa emkaam kiwa chong chnong kam i chait i khiah, ka puræ puthi, ka baam ka dih wa ka kamai kajih, ka jylla ha kini ki sanphaw snem ym ye ko wow pynbiang ya ki cha kiwa chong chong wei da man ko ka jylla kawa leh sih wei sahdien tam ha kini ki liang.
Ka bui (Report) hajrong ka puræ puthi kawa da tip kam ka PGI 2021 kawa da pynkhreh da ka chnat NITI AYOG da pynyoo wa ka jylla Meghalaya toh ka jylla kawa em cha tre dooh ha ka puræ puthi. Kawi na ki daw yong i hiar ka puræ puthi katkam katai ka Report toh wa ka sorkar jylla ym ye ko wow pynbiang yeiwa emkaam yong kiwa sikai ha ki thaw hikai yong ki, kawa kynthup leh yei su tulop.
Ka TUR da ong ko wa ka sorkar jylla na i por cha i por ong ko wym em poisa yow pynku ya ka tulop wei wow pynbiang ya kiwi ki emkaam yong kiwa sikai wei ini i ong toh i wym ye u pdiang neibhah kani ka jooh ka sorkar smat ko wow pynlut ke ya ka poisa paidbah wow thied ya ki kari thymme kiwa syad dor, wow chna ya ki wym bym phoida wa i pynlut ke ya ka poisa wow pynbiej donhi.
Ka sorkar jylla ka myllien ko katni wow chim ya ki ram na ki Bank kam ka ADB ha i pyrtuid wow chna ya ki skur wa ki College. I yukylli wa mih toh kiyi wow kit yow su ya kani ka ram? I maa wa khroo wa yang ya ka mynried ka yong i kiwa chong chnong wa ki khon yong i wa daw hap ki wow kit wei su ya ka ram.
Neiliang ka seiñ kiwa chongdai madan kawa tip kam ka Meghalaya & Greater Shillong Hawkers & Street Vendors Association leh da mih ki wow pynyoo yei kyrchaan ya kiwa sikai kiwa da pynman yei yakhih hakhmat ka Secretariat ha Shillong.
