Ka North-Eastern Hill University Teachers’ Association (NEHUTA) wa ka Non-Teaching Staff Association (NEHUNSA) da kyrchaan pura ki ya ka Prof. Sherwin Sungoh kamwa da chim ko ya i kaam kam ka Acting Vice Chancellor ka NEHU.
Kam ka dak wow kyrchaan ya ka, da pdiang burom ki ya i rai ka Prof. Sungoh wow hiar chuki kam ka Pro Vice Chancellor ka Shillong Campus wei wow chimkti kam ka Acting Vice Chancellor neidaw wa man ko kawa heh dooh i rta katkam ka kyndon Statute 2(A)(5)(i) ka University.
Hadien ka yalang yong ka NEHUTA wa ka NEHUNSA ynne, u President ka NEHUTA, u Prof. Lakhon Kma da ong u wa ka Prof. Sungoh pyndep ko ya i kaam katkam ki kyndon ka Ministry of Education.
Da pynbna u leh wa ka Acting VC ym ye ko wow thung bru, i kaamram yong ka toh wow khut yalang yong ka Executive Council, Academic Council wa ka Finance Committee wei ye ko leh wow thung kreh chipor kamjooh wow tyrwa pyrtuid yong ki Pro Vice Chancellor.
U Prof. Kma da ong chooh chooh u wa ka Acting VC ym ye ko wow pynkylla ya ki kyndon wa ki aiñ kam ka University Act, Statute, Regulation, Ordinance wei u pyndep ko yei kaamram u Vice Chancellor.
Ka Prof. Sungoh won ynne ym em ko hapoh ka Shillong Campus neibhah wa emkaam ko ha Tura.
Discussion about this post