Ka Khasi Students’ Union War Jaintia Circle deilang waka Hynniewtrep National Youth Front Southern Riwar Circle ynne ka sngi da pynman yalang ki ha Community Hall Dawki deilang wa ki Waheh Chnong, ki Dolloi wa ki khon khynroo hajrong ka phang wow pyrchah chwa chipor ya i kaam khayi pateiñ lyngba ka Tamabil Check Point.
U Laitphar Syngkrem President KSU WJC da ong u wa yieñ pyrchah ki hajrong ka yurim wa ka sorkar ym bna ko ya ki paidbah ka thaaiñ War Jaiñtia hanla em hadooh kat ini i maa kawa da e laad wow khayi pateiñ ya katni chi por. Ka seiñ wot hakhmat u Deputy Commissioner ka West Jaiñtia Hills District ha ka yalang wa da khut u ar sien da pynyoo ko yei pyrchah wei wow khang chwa ya ini i khayi neidaw wa joor i ku i poor uni u khñiang COVID-19 kawa booh hei maa yaka thaaiñ yong i.
Neiliang u President KSU JHDU u Ohibait Dkhar da ong u wa ka KSU ym jooh randien ko neibynta ka jaitbru wei u yieñ pyrchah khnang wa ka pateiñ wow wan daw suk ko khamtam ha kam ini i por wa ye u poi kani ka khlam COVID-19 hapoh War Jaiñtia.
Neiliang ki Dolloi ka Elaka Darrang, Elaka Satpator wa ka Elaka Nongtalang da e ki yei klam wow kyrchaan ya ki ar seiñ wow khang chwa ya ini i khayi.
Da yoh leh yei klam na ki Waheh Chnong ka Darrang, Shnongpdeng, Dawki, Amshipai, Secretary Chnong Khonglah, Waheh Chnong Riahjalong, Secretary Chnong Amkoi, Waheh Chnong Lymba, Waheh Chnong Ryngkum, Waheh Chnong wa Secretary Muktapur, Waheh Chnong Lamin, Waheh Chnong Kudeng Thymmai, General Secretary Sohkha kiwa da e i kyrchaan wa pura ya ki seiñ wow lai chakhmat.
Ka kyrwoh na u General Secretary KSU WJC u Lurman B. Talang.
